د فرانسې پولیسو د چهارشنبې په ورځ پر یوې ودانۍ چاپه واچوله چې په ترڅ کې يې دوه مشکوک ترهګر وژل شوي او اووه نور يې ژوندي نیولي دي.
چارواکي وايي په وژل شویو کې یوه ښځه ده چې په ځان پورې يې چاودېدونکي توکي تړلي وو او ځان يې وواژه.
عیني شاهدان وايي د چاودنو او ډزو اوازونو له خوبه پاڅول.
پولیس وايي د دغو عملیاتو هدف د پاریس د بریدونو یو طراح عبدالحمید اباعود و چې لا روښانه نه ده چې وژل شوي، ژوندی نیول شوی او که له سیمې تښتېدلی دی.
دی په اصلي کې د مراکش دی خو په بلجیم کې اوسېده.
د فرانسې د حکومت یو ویاند اعلان وکړ چې د سن دوني په سیمې کې پر يوې ودانۍ عملیات خلاص شوي دي، دغه عملیات شاوخوا اووه ساعته وو.
په دغو عملیاتو کې د فرانسې اووه پولیس هم ژوبل شوي دي او د فرانسې د پولیسو یو تعلیمي سپی هم وژل شوی دی.
د پاریس پولیس وايي له بریدونو وروسته یې تراوسه ۱۶ مشکوک کسان او اووه وسلې هم نیولي دي.
د فرانسې او بلجیم پولیسو د یو بل مشکوک کس صالح عبدي سلام د نیولو نړیوال خبرداری هم خپور کړی دی؛ باور دی چې د هغه ورور د پاریس په بریدونو کې ښکیل و او وژل شوی دی. د هغه یو بل ورور محمد له بریدونو سملاسي وروسته په فرانسې کې ونیول شو.
د فرانسې پولیس وايي د پاریس د جمعې د شپې د بریدونو د نورو مشکوکو طراحانو لټون هم کوي.
په دغو بریدونو کې ۱۲۹ تنه ووژل شول او تر ۳۰۰ زیات نور ژوبل شول، د دغو بریدونو مسولیت د داعش ډلې اخیستی دی.
د پاریس په بریدونو کې اووه بریدکوونکي شامل وو، چې درې يې د فرانسې ملي لوبغالي ته نژدې، درې نور يې د باتاکلان د کانسرت په تالار کې او یو بل يې یو رستورانت ته نژدې ووژل شول.
د فرانسې ولسمشر فرانسوا اولاند په خپل هېواد کې بېړنی حالت اعلان کړی دی.