د لاس رسي وړ اتصالات

اروپايي اتحاد او ترکيې د مهاجرو په اړه موافقه وکړه


په موافقې کې راغلي چې هغه مهاجرین چې ترکیې نه یونان ته ځي بیرته به ترکیې ته استول کیږي.

د اروپايي اتحاد مشرانو د مهاجرینو په اړه د ترکیې سره د هغې موافقې اصلاح شوې بڼه منظور کړه چې په اساس به یې اروپا ته د مهاجرینو د ورتګ مخه ونیول شي.

د اروپایي اتحاد د کمیسیون رئیس ډونالډ ټسک د ترکیې جمهور رئیس احمد داودغلو سره د ملاقات وروسته وویل چې اروپايي اتحاد د مهاجرینو په اړه موافقه بې له کومه تغیره منلې ده.

د اروپايي اتحاد یوه چارواکي وویل چې داوداغلو ورته ویلي و چې که د اروپايي اتحاد مشران موافقې ومني نو دوی به یې هم ومني.

د موافقې په اساس به د مارچ د ۲۰ نیټې نه وروسته چې کوم مهاجرین د ترکیې نه یونان ته ځي، بیرته ترکیې ته استول کیږي.

د دغه په بدل کې به د ترکیې سره، چې اوس هم درې میلیون مهاجر پکښې اوسیږي، مالي مرستې وشي.

په موافقه کې دا هم شامل دي چې په اروپايي اتحاد کې به د ترکیې د غړیتوب پروسه چټکه شي او د ترکیې اتباعو ته به د شینګېن هیوادونو ته د تګ لپاره د ویزې ضرورت نه وي.

په موافقه نیوکه

د اروپايي اتحاد د دې پلان په مسودې باندې د بشري حقونو د دفاع سازمانونو نیوکي کړي دي.

دغه سازمانونه وايي چې د دې پلان معنی به دا وي چې د مهاجرینو نه چې د جنګونو او تروریزم نه تښتيدلي ديسیاسي ګټه واخیستل شي. دوی په ترکیه باندي هم انتقاد کوي او وايي چې د بشري حقونو ښه سابقه نه لري.

مخکې له موافقې نه، د ترکیې صدراعظم ویلي و چې د مهاجرینو موضوع د بشردوستۍ موضوع ده نه یوه سیاسي موضوع:

«زموږ لپاره، د ترکیې لپاره د مهاجرینو موضوع د چنو وهلو موضوع نه ده. دا د بشري ارزښتونو موضوع ده او د اروپايي ارزښتونو موضوع ده. ترکیې ۲.۷ میلیون مهاجر منلي دي، پرته له دې چې څوک ورسره مرسته وکړي.»

د ۲۰۱۵ کال د جنوري د میاشتې نه راپدیخوا اروپا ته ۱.۲ میلیون مهاجر ورغلي دي. په هغو مهاجرو کې چې اروپا ته یې غوښتل چې ځانونه ورسوي، شاووخوا ۴۰۰۰ یې د ترکیې او یونان ترمنځ د مدیترانیې په سمندرګي کې غرق شوي دي.

XS
SM
MD
LG