د لاس رسي وړ اتصالات

افغانستان او ایران د همکارۍ تفاهم لیکونه لاسلیک کړل


جمهوري ریاست وايي د ایران ولسمشر ویلي غواړي له افغانستان سره د اقتصاد، کانونو، صنعت او سوداګرۍ په برخوکې خپلې همکارۍ زیاتې کړي

جمهوري ریاست وايي د ایران ولسمشر ویلي غواړي له افغانستان سره د اقتصاد، کانونو، صنعت او سوداګرۍ په برخوکې خپلې همکارۍ زیاتې کړي

ولسمشر غني د لوړ پوړي پلاوي په مشرۍ تهران ته د خپل دوه ورځني سفر په لومړۍ ورځ د دغه هېواد له ولسمشر او نورو لوړو پوړو چارواکو سره ولیده او د دواړو هېوادونو د اړیکو پر لا پراخولو او ښه کولو وغږېدل.

په همدې حال کې، افغانستان او ایران د بهرنیو چارو او لوړو زده کړو د وزارتونو ترمنځ د ګډې همکارۍ په برخو کې دوه تفاهم لیکونه لاسلیک کړل چې د چارواکو په خبره له مخې به یې تهران او کابل په یادو شویو برخو کې خپلې همکارۍ لا زیاتې کړي.

د افغانستان د جمهوري ریاست په خپرې شوې اعلامیې کې ویل شوي چې د ایران ولسمشر حسن روحاني وویل تهران غواړي له افغانستان سره د اقتصاد، کانونو، صنعت او سوداګرۍ په برخوکې خپلې همکارۍ زیاتې کړي او په ځانګړي ډول د چابهار بندر ترانزیتي لاره د ایران له زاهدان سره و نښلوي.

په اعلامیې کې همدغه راز ویل شوي چې ولسمشر غني له خپل ایراني انډول نه وغوښتل چې په ایران کې د ټولو افغان کډوالو نومونه ثبت او راجستر شي، چې بیا په تدریجې ډول یې افغانستان د بېرته ستنېدو بهیر پیل شي.

له جمهور رئیس محمد اشرف غني سره په دغه سفر کې د اجرائیه ریاست دویم مرستیال حاجي محمد محقق، د بهرنیو چارو وزیر صلاح الدین رباني، د ملي امنیت سلاکار محمد حنیف اتمر، د مالیې وزیر اکلیل حکیمي، د کانونو او پترولیم وزیر داوود شاه صبا، د کډوالو چارو وزیر سیدحسین عالمي بلخي، د جمهوري ریاست د چارو د ادارې لوی رئیس عبدالسلام رحیمي او د جمهوري ریاستویاند اجمل عبید عابدي ملګرتیا کوي.

افغانستان، سعودي، یمن او ایران

جمهوررئیس غني په داسې حال کې ایران تللی چې د افغانستان د ملي امنیت شورا د یمن په جګړه کې د سعودي عربستان خوا نیولې ده.

د افغانستان د چارو یو شمیر کارپوهان په دې نظر دي چې له سعودي عربستان څخه د افغانستان په ملاتړایرانخوشاله نه دی.

دا لومړی ځل دی چې واک ته له رسېدو وروسته، ولسمشر غني ایران ته سفر کوي.

دا لومړی ځل دی چې واک ته له رسېدو وروسته، ولسمشر غني ایران ته سفر کوي.

د سیاسي او سیمه ایزو چارو یو کارپوه احمد سعیدي دا ګڼي چې دا یوازې سفرونه دي او د سیمې د هیوادونو سره د اړیکو ښه کیدلو لپاره یو څه ناوخته شوی دی.

ښاغلی سعیدي وویل " د ښاغلي غني د سیاست لومړیتوبونه په لومړي قدم کې یعنی په لومړي پړاو کې چین، پاکستان او سعودي عربستان وو، په دوهم پړاو کې هندوستان او ایران وو".

ټاکل شوې د ایران وروسته جمهوررئیس غني د روانې عیسوي میاشتې په اوویشتمه هندوستان هم لاړ شي.

د افغانستان د چارو یو شمیر کار پوهان په دې نظر دي چې هندوستان هم د افغانستان او پاکستان د وروستیو ګرمو اړیکو د ټینګیدلو نه خوشاله نه دی.

خو د سیاسي چارو یو څیړونکی حامد صبوري امریکا غږ اشنا راډیو ته وویل چې ایران او هندوستان ته د جمهوررئیس غني سفر د پاکستان د سفر نه ډیر توپیر لري.

ښاغلی صبوري وویل " د جمهور رئیس د بهرني سیاست په لومړی حلقه کې د سیمې هیوادونه دي غواړي خپلې ټولې اړیکې دغو هیوادونو سره تر کومه چې امکان لري سمې کړي".

ښاغلی صبوري وایي چې پاکستان ته د جمهور رئیس غني د سفر ډیره برخه د سولې مسله وه خو ایران او هندوستان ته د هغه د سفر په موضوعاتو کې د سولې د مسلې سربیره اقتصادي او امنیتي مسلې هم شاملي دي.

د افغانستان د چارو دا کارپوه هم وایي چې جمهور رئیس به هڅه وکړي چې د هندوستان اندیښنو ته چې پاکستان سره د افغان حکومت له نږدې کیدلو دغه هیواد ته پیدا شوي هم ځواب ورکړي.

XS
SM
MD
LG