ريزه ګل د امریکا غږ سره په مرکه ویلي چې د ميړه له ډير ظلم څخه په پټه د خپلې وړې لور سره په توره شپه راوتښتيدله او د پلار کورته راغله. ٢۴ ورځې وروسته د کلی د سپين ږيرو په جرگه او د خسر گنۍ په ننواتو بيرته د ميړه کورته روانه شوه، خو په لار کې يي د میړه له خوا پزه پرې شوه.
ریزه گل د فاریاب ولایت د غورماچ په لېرې پرته او ناامنه ولسوالۍ کې ژوند کاوه چې د پزې د پریکیدو له پیښې وروسته لومړی د غورماچ په روغتیایي مرکز او بیا د فاریاب په دولتي روغتون کې بستر شوی وه. هغه وروسته بیا د کابل یو روغتون کې بستر شوه او له هغه ځایه ترکیې ته د درملنې لپاره یووړل شوه.
که څه هم چې د ښځو چارو وزارت د نورو کلونو په پرتله په تیر یو کال کې د ښځو پر وړاندې د تاوتریخوالي قضیې کمې ښېې خو وروستې زړه بوږنونکې پېښې څرګندوي چې افغان میرمنې له پر له پسې دردونکي تاوتریخوالو سره مخامخ دي.
د ښځو چارو وزارت شمېرې ښېې چې تیر کال کې د ښځو پر وړاندې د تاوتریخوالي ۴ زره قضیې ثبت شویدي.
د ښځو د چارو فعالان او شنونکي عدالت ته د ښځو په نه لاس رسي انتقاد کوي او وایي چې په دې اړه د تیرو کلونو هڅو لږې پایلې درلودې.
ريزه گله د ترکيې له روغتون څخه د اشنا راډيو سره په مرکه کې د خپل ژوند د ناخوالیو او خپلې روغتيا په هکله غږيدلې ده.
د اشنا راډيو له همکارې نوشابې اشنا سره د ریزه گلې بشپړه مرکه دلته اوريدلائ شئ.
