د لاس رسي وړ اتصالات

د استانبول د بمي حملو په تړاو ٢٣٥ کسان نیول شوي


په دغه برید کې ۴۴ تنه ووژل شول او لسګونه نور ژوبل شول

په دغه برید کې ۴۴ تنه ووژل شول او لسګونه نور ژوبل شول

په داسې حال کې چې ترکان د استانبول د فوټبال د ستدیوم بهر په بمي حملو کې د لسگونو وژل شویو کسانو ماتم کوي، پولیسو د هیواد په گوټ گوټ کې په سلگونو کسان ددې پیښې په تړاو نیولي دي.

د ترکیې د دولتي اژانس انادولو د رپوټ له مخې د ترکیې په ١١ ښارونو کې ٢٣٥ کسان د ترهگرۍ او په ټولنیزو رسنیو کې د تروریستي پروپاگند د خپرولو په تور نیول شوي دي.

د دولتي رسنیو رپوټونه وایي چې ترکي مقاماتو وروسته له هغې په دې اقدام لاس پورې کړ چې د کردستان د کارگر گوند نه یوې جلا شوې ډلې د استانبول ښار د ورزشي ستدیوم بهر د بمي حملو مسولیت په غاړه واخیست.

د وروستیو شمیرو له مخې د استانبول په بمي حملو کې ۴۴ کسان وژل شوي او ١۴٩ تنه نور ټپیان شوي دي. د کردي یاغي ډلې له لورې د حملې د مسولیت له منلو وروسته د ترکیې پوځ په یوه اعلامیه کې وویل چې د عراق په شمال کې یې د کردستان د کارگر گوند په هدفونو بمباري کړې ده.

د خلق دموکراتیک گوند چې د کردانو پلوي دی په ترکیه کې دوهم ستر اپوزیسیون گڼل کیږي. ددې گوند یو شمیر مشران د کردستان د کارگر گوند سره د اړیکو د لرلو په تور بندیان شوي دي او محاکمې ته انتظار باسي.

د ترکیې د روغیتایي چارو وزیر د دوشنبې په ورځ وویل چې د استانبول د بمي حملو په تلفاتو کې ٣٦ پولیس منصبدار او اته ملکي وگړي شامل دي.

دغه حملې چې د ترکیې د فوټبال د لومړي لیگ د یوې لوبې وروسته وشوې، د ترکیې فټبال پلوه ولس یې ولړزاوه او د ترهگرۍ پر ضد د وطنپالو مظاهرو سبب شو. مظاهره کوونکو د کردستان د کارگر گوند ضد شعارونه ورکول.

د استانبول د بشیکتاس دغه نوی ستدیوم د بشیکتاس د فټبال د مشهور ټیم په نوم نومول شوی دی.

د ترکیې جمهور رئیس رجب طیب اردوغان او نورو ترکي مقاماتو د خلق دموکراتیک گوند د ترهگرۍ په ملاتړ او د کردستان د کارگر د غیر قانوني اعلان شوي گوند سره په اړیکو تورن کړی دی.

د خلق دموکراتیک گوند چې په ٢٠١۴ کې یې په انتخاباتو کې وکړای شول چې پارلمان ته لاره ومومي، دا ډول تورونه رد کړي دي.

ترکیه د هیواد په جنوب ختیځ کې د کردي یاغیانو سره په تازه شخړو بوخت ده په روان کال کې د یو لړ ځان مرگو حملو سره مخامخ شوی ده.

په ترکیه کې میشت یوه کردي ډله چې د "آزادۍ د شاهین غورځنگ" په نامه شهرت لري د استانبول د دوه گونو بمي حملو مسولیت په غاړه اخیستی دی.

دغې ډلې ویلي دي چې د دوی دغه اقدام د ترکیې په جنوب ختیځ کې د دولت د زور زیاتي او د کردستان د کارگر گوند د مشر عبدالله اوجالان د نیولو په غبرگون کې شوی دی.

د ترکیې د دولت او د کردستان د کارگر گوند ترمنځ د څو لسیزو تاوتریخوالي په نتیجه کې په لسگونو زره کسان وژل شوي دي. دغه تاوتریخوالي د ٢٠١٥ کال د سولې د خبرو له ناکامیدو وروسته زور اخیستی دی.

XS
SM
MD
LG