د ایران د دولتي تلویزون په وینا هغه دوه امریکایان چې د تیرو دوه کلونو راهیسې په تهران کې بندیان وو، ایران ته په غیر قانوني ننوتلو او د جاسوسئ په تور هر یو یې په اته کاله بند محکوم اعلان شول.
شان باور او جاش فاتل په دوه زره نهه کال کې د ایران او عراق په ګډه سرحدي پوله کې تر نیول کیدو وروسته بندیان شوي وو. دریمه امریکايي چې د همدوی سره یوځای نیول شوی وه سارا شورډ نومیږي او د تیرکال په سپتمبر میاشت کې د پنځه سوه زره امریکايي ډالرو په ضمانت ورکولو خوشی او امریکا ته ستنه شوه.
د ایران د دولتي تلویزون د ویبپاڼی له مخې باور او فاتل چې دواړه اته ویشت کاله عمر لري دری دری کاله ایران ته په غیر قانوني ننوتلو او پنځه پنځه کاله امریکا ته د جاسوسئ په تور بندیان شوي. یاد شوي دواړه کسان شاوخوا شل ورځی وخت لري چې د استیناف غوښتنه وکړي.