د امریکا د ملي امنیت یو پخواني سلاکار کانګرس ته وویل چې د اسامه بن لادن له مرګ وروسته لا تر اوسه د امریکا او پاکستان اړیکې ناڅرګندې پاتې دي. متقاعد جنرال جیمز جونز وویل که پاکستان ددغو ټکنیو اړیکو ښه کیدل غواړي نو باید پخپله رویه کې بدلون راولي.
پاکستاني چارواکي وايي نن پیښور ته نږدې د ۷۰ تنو طالبانو یوې ډلې پر امنیتي پوستې برید وکړ دوه پولیس یې ووژل او پنځه نور یې زخمیان کړل.چارواکي وايي په جګړه کې ۱۵ بریدکوونکي هم وژل شوي دي.
چارواکي همدارنګه واييپه کوټه کې د فرقيي تشدد په لړ کې په موټر سایکل سپاره یوه تن پر یوه موټر ډزې وکړې او ۴ شعیه ګان یې ووژل.
له دې یوه ورځ مخکې رپوټونو وښودله چې د افغانستان او پاکستان په سرحدي سیمه کې د ناټو د هیلکوپترو او پاکستاني عسکرو تر منځ په ډزو کې دوه پاکستانيعسکر زخمي شوي دي.
په عین وخت کې، د تیرو څو اوونیو راهیسې د کانګرس غړي دا پوښتنه کوي چې آیا پاکستان ته د امریکا د میلیاردونو ډالرو مرستې پرځای دي؟ د ایډاهو ایالت جمهوري غوښتونکی سناتور جیمز ریچ وايي اسلام آباد ته نږدې د امریکايي خاصو قواوو په عملیاتو کې د اسامه بن لادن له وژل کیدو راوروسته په پاکستان کې د امریکا ضد احساسات په زیاتېدو دي.
جیمز ریچ، جمهوري غوښتونکی سناتور:
((هلته هره احصایه ښيي چې دوی موږ نه خوښوي. پر دوی د تیر کال د سیلابونو ناورین تیر شو. موږ د مرستې لپاره تر ټولو لومړی ورغلو. عسکر مو ور ولیږل او د خلکو ژوند مو وژغوره. په سلګونو میلیونه ډالر مو د دوی د پلونو په رغولو ولګول. د ایډاهو خلک پوښتنه کوي چې ولې موږ د خپلو بچو پیسې پر داسې ملک ولګوو چې موږ نه خوښوي)).
د امریکا د ملي امنیت یو پخواني سلاکار متقاعد جنرال جیمز جونز، د سنا د بهرنیو اړیکو کمیټې ته ورغوښتل شوی و او د پاکستان د اعمالو په اړه یې په زغرده خبرې وکړې.
((باید په رویه کې یې بدلون راشي))
د بهرنیو اړیکو د کمیټې رئیس د یموکرات سناتور جان کیري وویل بې شمیره دلایل ایجابوي چې امریکا باید له پاکستان سره ښې اړیکې وساتي. سناتور کیري په افغانستان کې د امریکايي قواوو شتون ته اشاره وکړه.
جان کیری، د سنا د بهرنیو اړیکو د کمیټې رئیس:
((زموږ عسکر په افغانستان کې دي. په همدې سبب او لږ تر لږه زموږ ددې هدف لپاره چې غواړو القاعده ورکه شي)).
جنرال جونز وویل پاکستان به همداسې زړه نازړه د امریکا ملګرتوب کوي ځکه چې دغه ملک باور لري چې له افغانستان څخه د امریکايي عسکرو له وتلو وروسته به امریکا په سیمه کې خپل پراخ فعالیت او مرستې راکمې کړي.