د لاس رسي وړ اتصالات

افغان مړو ته د سپکاوي په هکله د امریکا د مطبوعاتو تبصرې


افغان مړو ته د سپکاوي په هکله د امریکا د مطبوعاتو تبصرې

افغان مړو ته د سپکاوي په هکله د امریکا د مطبوعاتو تبصرې

د واشنګټن پوست ورځپاڼه د جنورۍ د ۱۳ مې نېټې په ګڼه کې لیکي چې د پنجشنبې په ورځ د ولسمشر اوباما حکومت هڅه وکړه چې د هغې ویډیو قوي غندنه وکړي چې په انټرنیټ باندي راښکاره سوه او په کښي ښودل کېږي چې د امریکا د سمندري قواووغړي د افغان مړو بې حرمتي کوي.

ورځپاڼه لیکي چې امریکايي چارواکو هڅه وکړه چې دغه ویډیو د زیات شمیر خلګو د غبرګون کولو سبب نشي او دغه راز د طالبانو سره د سولې د خبرو پر لومړي پړاو باندي اغیزه ونکړي.

په داسي حال کې چې د سمندري قواوو انځورونه په رسنیو کې خپاره شوه چې د درو افغانانو پر مړو باندي بولي کوي، د امریکا ددفاع وزیر لیان پنیتا دغه ویډیو وغندله او د افغانستان ولسمشر حامد کرزي ته یې په ټلفون کې ډاډ ورکړ چې دغه پېښه به په بشپړه او هر اړخیزه توګه وڅیړل شي.

ښاغلي پینتا د فورت بلیس نظامي اډې ته د سفر پر مهال په یوې مرکې وویل چې زه غواړم ولسمشر کرزی په دې پوه شي چې مونږ د پېښې له امله ډیر خپه او خواشیني یو . ورځپاڼه د دفاع وزیر پنیتا له قوله لیکي چې وايي ،، زه غواړم دا وڅیړم چې څه شوي دي او کوم قوانین تر پښو لاندي شوي او سرغړونکي څوک دي.،،

دغه راز د امریکا د باندنیو چارو وزیرې هیلري کلینټن هم د خپرې شوي ویډیو په هکله خپګان څرګند کړ او د امریکا د وسله والو قواوو لوی درستیز د جنرال مارتین ډیمپسي وايي چې هغه یادشوې ویډیو ډیر متاثره کړی او دغه راز اعمال د ټولو وسله والو قواوو د بدنامۍ په بیه تمامېږي.

ورځپاڼه لیکي چې امریکا ځکه سمدستي غبرګون وښود چې د ۲۰۰۴ کال د پېښې په شان د نړیوالو د غوصې د راپاریدو مخنیوی وکړي. په ۲۰۰۴ کال کې داسي انځورونه خپاره شول چې په کښي د ابوغریب په زندان کې عراقي د بندیانو سپکاوی معلومیدی.

ورځپاڼه لیکي چې نظامي چارواکو ویره درلوده چې دغه راز انځورونه کولای شي چې په افغانستان کې په یوه حساس وخت کې د خلګو د جدي عکس العمل سبب شي.

ورځپاڼه لیکي چې امریکايي نظامیانو په داسي حال کې چې غواړي د افغان ولسمشر حامد کرزي نه خپل حمایت ته ادامه ورکړي، په عین حال کې غواړي چې د طالبانو سره د شخړې د هوارولو دپاره سیاسي حل لاره وموندي.

ورځپاڼه لیکي چې د امریکا متحده ایالات اوس د افغانستان د عامو خلګو سره هم مخامخ دی چې د جګړې نه خسته شوي او ځیني وخت د طالبانو پروپاګندې ته چې د بهرنیو قواوو د حضور او اهدافو په هکله یې کوي د همدردۍ غوږ نیسي.

ورځپاڼه لیکي مخکي له دېنه چې ښاغلي کرزي سره د دفاع د وزیر پنیتا د خوا ټلفوني اړیکې ټینګې شي هغه سمدستي د ویډیو د خپریدو څخه وروسته غبرګون څرګند کړ او په قوي الفاظو باندي یې دغه ویډیو وغندله. د ښاغلي کرزي حکومت وویل چې د امریکا پوځ دي د پېښې لاملین په تر ټولو سختۍ جزا محکوم کړي.

ورځپاڼه لیکي چې نوموړې ویډیو د چارشنبې په ورځ د لومړي ځل دپاره د انترنیټ پر مخ راڅرګنده شوه او ډیر ژر د نړۍ په بیلابیلو رسنیزو سرچینو کې خپره شوه.

ورځپاڼه لیکي چې د امریکا د سمندري قواوو د قول اردو عمومي قوماندان سترجنرال جیمس اموس وویل چې هغه د سمندري قواوو د جنیايي تحقیقاتو د یوې ډلې نه غوښتي دي چې د تر ټولو غوره څیړونکو یوه ډله دي تشکیل کړي چې دغه پېښه په هر اړخیزه توګه وڅیړي.

سترجنرال جیمس وویل چې هغه به په عین وخت کې د سمندري قواوو یو لوړ پوړی چارواکی ډګر جنرال ټامس والدهوسر هم وټاکي چې دغه پېښه په موازي توګه وڅیړي. جنرال والدهوسر د امریکا د سمندري قواوو د مرکزي قوماندانۍ عمومي قوماندان دی.

ورځپاڼه د امریکا د سمندري قواوو د قول اردو د عمومي قوماندان سترجنرال جیمس له قوله لیکي چې دغه قول اردو به تر هغه آرامه کښېنني چې دغه موضوع حل شوې نه وي.

ورځپاڼه لیکي چې د امریکا د نظامي قوانینو پر اساس او د جینیوا د کانوینسیون پر بنسټ په جګړې کې د دښمن مړو ته سپکاوی منع دی.

بل پلوه د امریکا د نیویارک ټایمز ورځپاڼې هم د جنورۍ د ۱۳ مې نېټې په ګنه کې د امریکايي سرتیرو له خوا د افغانانو و مړو ته د سپکاوي په هکله مقاله خپره کړې او وايي چې دې کار د پنجشنبې په ورځ په پراخه اندازه غبرګونونه خپاره کړل.

نیویارک ټایمز لیکي چې د ولسمشر اوباما حکومت هڅه کوي چې د افغانستان ولسمشر حامد کرزی یې په څنګ کې پاته شي په داسي حال کې چې دوي غواړي د طالبانو سره د سولې خبري پرانیزي. خو ورځپاڼه لیکي چې وروستۍ راښکاره شوې ویډیو په دواړو خواوو کې د امریکا دریځ کمزوره کړی دی.

ورځپاڼه لیکي چې دواړو طالبانو او د افغانستان حکومت یادشوې ویډیو ته د امریکا د ظلم د نښې خطاب وکړ.

ورځپاڼه لیکي چې په کابل او واشنګټن کې لوړ پوړو امریکايي چارواکو دا تایید کړه چې ویډیو اصلي ده او په کښي د سمندري قواوو د قول اردو د دریم نمبر کنډک سرتیري چې تیر منی یې په افغانستان کې په وظیفه کې تیر کړ، معلومیږي.

ورځپاڼه دغه راز د میرمن کلینټن له قوله هم لیکي چې دغه کار د امریکا د معیارونو او ارزښتونو سره په تضاد کې واقع کیږي. کلینټن وویل،، چې هرڅوک چې په دې پېښه کې دخیل وي باید په بشپړه توګه مسول وګڼل شي.،،

XS
SM
MD
LG