د لاس رسي وړ اتصالات

امریکا وايي باید د بشار الاسد د لېرې کېدو پرېکړه وشي


جان کیري له ایران او روسیې وغوښتل چې پر بشار الاسد فشار راوړي چې له واکه لېرې شي.

جان کیري له ایران او روسیې وغوښتل چې پر بشار الاسد فشار راوړي چې له واکه لېرې شي.

د متحده ایالاتو د بهرنیو چارو وزیر جان کیري وایي جمهور رېیس اسد به ګوښه شي خو د هغه د لری کیدو وخت به د مذاکرو له لاری تعین شي.

ښاغلی کیري د خپل بریتانوي سیال سره د خبرو دپاره په لندن کې دی.

د بریتانیې د بهرنیو چارو د وزیر سره ترخبرو وروسته، ښاغلي کیري د روسیې او ایران نه وغوښتل چې پر اسد د خپل نفوذ نه کار واخلي او هغه قانع کړي چې د قدرت سیاسي انتقال لپاره خبرې وکړي.

کیري وایي "د تیر یونیم کال راهیسې موږ وایو چې اسد باید لری شي . په څه ډول باید لری شي، دا هغه پریکړه ده چې د ژنیو د مذاکرو په چوکاټ کې باید فیصله شي."

ښاغلی کیري وایي، متحده ایالات په سوریه کې د داعش د ځپلو په برخه کې د روسیې دخالت ستایي، خو دمهاجرینو کړکېچ ورځ تربلی خرابیږي او یوې داسې همکارۍ ته اړتیا لري چې د مصالحې یوه لاره پیدا شي چی په هغه هیواد کې د یو سیاسي بدلون سبب شي.

کیري وویل "موږ مذاکرو ته چمتو یو خو آیا اسد ریښتنو مذاکرو ته چمتو دی؟ آیا روسیه دیته اماده ده چې هغه د مذاکراتو مجلس ته راولي؟"

ښاغلی کیري نن د جرمني مقاماتو سره په برلین کې خبرې کوي.

سوریه او روسیه!

پدې وروستیو کې د سوریې یوې نظامي منبعې وویل ځواکونو یي هغه نوې هوایي او ځمکنۍ وسلې استعمال کړې چی د روسیې لخوا ورته ورکړل شوي.

دا د روسیې داسې مرسته ده چې د بریتانیې د بهرنیو چارو د وزیر فیلیپ هامند په وینا همدا مداخله په سوریه کې د وضعیت د خرابیدو سبب شو.

ښاغلی هامند وایي "د روسیې د دخالت په وجهې په سوریه کې حالات ورځ تربلی پیچلي کیږي."

ښاغلی هامند پدې باور دی چې باید په دې مسله د یوې لویې ستونزې په شکل بحث وشي، ځکه د هامند په وینا پدې موضوعاتو کې د مهاجرت فشار، په سوریه کې بشري ناورین، او ترڅنګ یی د داعش د ډلې د ځپلو لپاره ضرورت شامل دی.

روسیه وایي په سوریه کې د هغوﺉ وروستي نظامي فعالیتونه ددی دپاره شوي چې هلته د داعش ډله وځپي. خو چارواکي وایي په سوریه کې د روسیې دا نظامي تحرکات، د افغانستان په جګړه کې د پخواني شوروي اتحاد له مداخلې نه وروسته، ترټولو پراخ نظامي ماموریت گڼل کېږی چی بهرته ېې لیږلی دی.

XS
SM
MD
LG