د امریکا ولسمشر براک اوباما په ختیځې افریقا کې د ترورریزم سره په مبارزې کې د ایتوپیا نقش وستایه خو تر څنګ یې د دغه هیواد د مشرانو نه وغوښتل چې د بشري حقونو درناوي دې وکړي او د ښې حکومتوالۍ ډاډ دې ورکړي.
براک اوباما د امریکا لومړنی ولسمشر شو چې ایتوپیا ته سفر کوي. هغه پرون د صدراعظم هیلي میریم دسیالین سره د ایتوپیا په ملي ماڼۍ کې وکتل. اوباما ژمنه وکړه چې د سخت دریزه ډلو سره په مبارزې کې به د ایتوپیا لاس نیوی کوي.
هغه همدرانګه په سومالیې کې د الشباب د وسله والې ډلې په خلاف د ایتوپیایي ځواکونو کړنې وستایلې او زیاته یې کړه چې د دغو ځواکونو له برکته نه یوازې په سومالیې بلکه د ایتوپیا په یو شمیر ګاونډیو هیوادونو کې هم امنیتي وضعیت ښه شویدی.
" ایتوپیا د افریقا په لویې وچې کې تر ټوله موثره پوځي قوه لري او لکه چې ما مخکې هم وویل، د ایتوپیا پوځ د سوله ساتونکوځواکونو تر ټولو ستر مرسته کوونکي پوځ دی. د همدې موثریت له وجې هغوي د زیاتو وینو د تویدو مخه نیولي ده او مونږ غواړو چې د هغوي مرسته باید وشي. "
خو د امنیتي ځواکونو د ستاینې تر څنګ ولسمشر براک اوباما د بشري حقونو او ښې حکومتدارۍ په برخې کې د ایتوپیا د کړنو په اړه ډانګ پیلې څرګندونې وکړلې.
د ایتوپیا د صدراعظم هیلي میریم،ګوند په اکثرو پارلیماني انتخاباتو کې سل په سلو کې ټولې څوکۍ ګټلي دي او دا تور پرې دی چې په لس ګونه سیاسي مخالفین او ژورنالیستان یې د تروریزم ضد د عملیاتو په بهانې نیولي او بندیان کړي یې دي.
ښاغلي میریم، ژمنه وکړه چې په حکومتي چارو کې به سمون راولي او زیاته یې کړه چې د دیموکراسۍ لپاره زمونږ ژمنې حقیت لري او یوازې د کاغذ پر مخ خبرې ندي.
" مونږ پدې ښه پوهیږو چې د ایتوپیا په اړه نظرونه او هغه څه چې په حقیقت کې دي، زیاتو برخو کې یو شان ندي، دا زمونږ د پاره یوه اندیښنه ده او غواړو چې کار پرې وکړو. خو باید دا هم وویل شي چې زمونږ په هیواد کې دیموکراسې لا بیخي نوې ده. "
د امریکا ولسمشر براک اوبام د افریقا لویې وچې ته پدې سفر کې کوښي کوي چې په جنوبي سوډان کې روان کړکیچ ته هم د حل یوه لاره پیدا کړي. هغه پرون د دوشنبې په ورځ د کینیا، یوګانډا او افریقایي ټولنې د مشرانو سره غونډې درلودې او د جنوبي سوډان په وضعیت یې خبرې کړیدي. اوباما خبرداری ورکړ چې په جنوبي سوډان کې بشري وضعیت ورځ په ورځ خرابیږي او دا چې وخت هم مخ په تیریدو دی.