د لاس رسي وړ اتصالات

د پاکستان پوځ ١١ طالبان اعداموي


پوځي محکمې دغه ١١ تنه په ترهگرۍ، تښتونو، پر ملکي وگړو، پولیسو او پوځیانو باندې په بریدونو محکوم کړي دي.
پوځي محکمې دغه ١١ تنه په ترهگرۍ، تښتونو، پر ملکي وگړو، پولیسو او پوځیانو باندې په بریدونو محکوم کړي دي.

د پاکستان د پوځ لوی درستیز راحیل شریف د ١١ طالبانو د اعدام سزا لاس لیک کړه چې د پوځي محکمې له لورې په ترهگرۍ، تښتونو، پر ملکي وگړو، پولیسو او پوځیانو باندې په بریدونو محکوم شوي وو.

دغه ١١ تنه طالبان وروسته له هغې د پوځي محکمې له لورې د بندو دروازو تر شا محاکمه شول چې دغې هیواد په ٢٠١۴ کې د پیښور پر یو ښوونځي باندې د مرگوني برید وروسته د مرگ د سزا د بندولو په اړه د ٢٠٠٨ کال قانوني پریکړه فسخه کړه.

د پاکستان پوځ د سه شنبې په ورځ وویل چې جنرال راحیل شریف په مرګ د محکومو شویو طالبانو د اعدامولو پریکړه لاس لیک کړه. خو دا سمدستي نه ده روښانه شوې چې دغه اعدامونه به څه وخت ترسره شي. محکمومین د استیناف د غوښتنې حق لري.

د څلورو محکومینو نومونه په ډاګه شوي - مولوي دلبر خان، حمیدالله، محمد نبي او رحمت الله نومونه – او ویل شوي چې په ٢٠١٣ کې د پولیسو د یو قوماندان او دوو لوړپوړو پوځیانو په وژلو یې اعتراف کړی دی.

د پاکستان د پوځ ویاند عاصم بجوا رسنیو ته ویلي دي چې تر اوسه په پاکستان کې شاوخوا ٢٠٧ تنه طالبان په پوځي محکمو کې محاکمه شوي دي او د ٨٨ تنو محکومیت اعلان شوی دی.

په داسې حال کې چې پاکستاني طالبان د خپلو محلي او نړیوالو اسلامي سخت دریځو په ملتیا د یوې لسیزې راهسې د دولت پر ضد په جگړه بوخت دي او په لسگونو زره خلک یې وژلي دي، د بشري حقونو ډلو د پوځي محکمو د جریان په اړه اندیښنه څرگنده کړې ده. ددغو محکمو جریان ته رسنۍ او عام خلک لاس رسی نه لري.

د بخښنې نړیوال سازمان ویلي دي چې پاکستان په ٢٠١٥ کال کې د ٣٢٦ تنو په اعدامولو سره د چین او ایران وروسته د هغو هیوادونو د ډلې په دریمه درجه کې راغلی دی چې د اعدام حکومونه یې پلي کړي دي.

رپوټ: اسوشیتدپرس
ژباړه: عارف عثمانزوی

XS
SM
MD
LG