د اولمپیک نړیواله شورا هر کال د جون د اولسمې نه تر څلیریشتمې پورې د اولمپیک اوونۍ نمانځي. بیا په تیره د جون درویشتمه په نړۍ کې د اولمپیک د ځانگړې ورځ په توگه نمانځل کیږي. د اولمپیک مشالونه بلیږي او ځانگړې غونډې جوړیږي او لوبې نندارې ته وړاندې کیږي.
دا ورځ د افغانستان اولمپیک کمیټه هم نمانځي او تر اوسه ېې د هیواد په یو شمیر ولایتونو کې د یو پروگرامونو په ترتیبولو سره نمانځلې او غواړي چې کابل کې ېې هم په پراخ ډول ونمانځي.
د افغانستان د اولمپیک کمیټې مشر ښاغلي ظاهر اغبر د امریکا غږ آشنا راډیو سره مرکه کې ویلي چې دوي شنبې یا یکشنبې ته دې لړ کې د یو سترې غونډې دپاره تابیا کړیده چې د افغانستان د ملي وحدت اجرایوي ریس ډاکټر عبدالله عبدالله او نور دولتي مشران پکې گډون کوي.
ښاغلي ظاهر اغبر وویل چې دا وخت د اولمپیک کمیټه د هیواد په ټولو برخو د اولمپیک د فیدراسیونو چارې څاري او د ښځینه ورزشکارانو په گډون ټولو لوبو ته مساوي ډول باندې پام کوي.
هغه د بودیجې د کمي او ځینو نور ستونزو یادونه هم وکړه خو دا ېې ویل چې ده هڅه کړیده چې افغانستان کې د اولمپیک چارې د ملي یووالي او دسولې د روحېې سره پرمخ لاړې شي.