نن د عربي هیوادونو د مشرانو د غونډې په پیل کې د سورې جمهور رئیس بشار الاسد د هغو تورونو بر خلاف له خپل ملک څخه دفاع وکړه چې وايي سوریه د لبنان په سیاسي چارو کې لاس وهي.
بشار الاسد وویل، برعکس، د تیر یوه کال راهیسې پر سورې باندې دا فشار اچول شوی چې د لبنان په چارو کې مداخله وکړي. هغه زیاته کړه چې د سیاسي ثبات کیلي په خپله د لبنانیانو په لاس کې ده.
د عربي هیوادونو د رهبرانو دغه غونډه د سوریې په پایتخت دمشق کې روانه ده.
په دغه غونډه کې د مصر د جمهور رئیس حسني مبارک، د اردن پاچا عبدالله او د لبنان صدراعظم فواد سنیورا په گډون یو شمیر د عربي هیوادونو رهبرانو چې له امریکا سره نږدې اړیکې لري، گډون ندی کړی.
دوی پر سورې تور لگوي چې د لبنان په سیاسي چارو کې مداخله کوي.