د افغانستان پولیس وايي دوی هغه طالبان قومندان بیرته نیولی دى چې مخکى دوه ځلې د حکومت له زندان څخه تښتیدلی و.
د هلمند د امنیت قومندان محمد حسین انډیوال نن د سه شنبې په ورځ وویل ملا نقیب الله یې د دوشنبې په ورځ لښکرگاه ته نږدې په یوه جگړه کې ونیوه.
هغه وویل، ملا نقیب الله د یاغیانو د هغې ډلې رهبري کوله چې د پولیسو یونیفورم یې اغوستی و او د پولیسو پر یوه گزمه یې حمله وکړه.
په جگړه کې درې طالب یاغیان وژل شوي او لږ تر لږه دوه پولیس او پخپله ملا نقیب الله زخمیان دي.
ملا نقیب الله څو میاشتې وړاندې د افغانستان د استخباراتو له بند څخه وتښتید. دوه کاله مخکې هغه په کابل کې د څرخي پله له زندان څخه په تیښته بریالی شوی و.