افغان چارواکي وایی چی یوه ځان مرگه بم چونکي درې تنه په کابل کی وژلي دي او په عین حال کی د افغانستان په جنوب لویدیځ کی د یاغي طالبانو سره د افغان او ناتو د قواو جگړو زور اخیستی دی.
پولیسو په کابل کی وویل چی بم چونکي خپل بم د ائتلافي قواو د موټرو کتار ته هغه وخت وچاوه چی دغه موټر د ښار په یوه واټ باندی روان و.
په دې چاودنه کی درې لارویان چی یو ماشوم هم په کی شامل و، مړه شوي دي. د ائتلاف یوه نطاق امریکایی ډگرمن ډېف جانسن وویل چی په عسکرو کی یې هیچا ته تاوان نه دی رسیدلی.
او د فراه د ولایت پولیس وایی چی افغان او د ناتو قواو یاغی طالبانو ته زیات تلفات رسولي دي. پولیسو وویل چی افغان عسکرو طالبان هغه وخت محاصره کړل چی هغوی د بالابلوک په ولسوالي کی را غونډ سوي وو.
او وروسته د ناتو قواو د هوایي حملې امر ورکړ. په دې حمله کی ٣٠ طالبان ووژل سول او په حکومتي قواو کی دوه عسکر او یو پولیس وژل سوی دی.