په زرگونو د پاکستان د محکمو وکیلان د پاکستان په لویو ښارونو کې لارو کوڅو ته راوتلي دي او د پخواني جمهور رئیس پرویز مشرف په لاس د بر[طرفه شویو قاضیانو د بیرته برحالولو غوښتنه کوي.
دغو وکیلانو نن د پنجشنبې په ورځ، په اسلام آباد، لاهور او ځینو نورو ښارونو کې د دوو ساعتونو لپاره سرکونه بند کړي وو.
د مظاهره کوونکو تور بیرغونه په لاس کې وو او د پاکستان د حکومت او د آصف علي زرداري په مشرئ د پیپلز پارټۍ پر ضد یې شعارونه ورکول.
مظاهره چیانو پر لارو کوڅو پر دیوالوالونو باندې د آصف زرداري لگیدلي پوسټرونه څیري کړل. زرداري د سپتمبر د شپږمې د جمهوري ریاست انتخاباتو ته ځان کاندید کړی دی.
وکیلانو پر زرداري تور ولگاوه چې د هغو ٦٠ قاضیانو د برحالئ مخه یې نیولې چې تیر کال پرویز مشرف په ملک کې د اضطراري حالت د اعلانولو پر وخت برطرفه کړل. مشرف تیره اونۍ استعفی وکړه.
که څه هم حکومت د سند په ایالت کې اته قاضیان بیرته په خپلو وظیفو مقرر کړي دي، خو مظاهره کوونکو د محکمو وکیلانو دغه اقدام ناکافي وباله او د ټولو قاضیانو د بیرته مقررېدو غوښتنه یې کوله.