د هند چارواکي وايي، د ملک په ختیځه برخه کې په یوه درمسال کې نن د سه شنبې په ورځ د گڼې گوڼې له آمله خلک تر پښو لاندې شوي او تقریبا ١٥٠ تنه وژل شوي دي.
چارواکي وايي، د جدپور د ښار د چمونډا په درمسال کې په دغه پیښه کې ډیر خلک زخمي شوي دي دي. په زرگونو هندوان د خپلې یوې مذهبي ورځې د لمانځلو په مناسبت د غره د څنگ په دغه درمسال کې راټول شوي وو.
چارواکي وايي، دغه مرگانۍ پیښه هغه وخت وشوه چې ډیر خلک د غره پر یوې تنگې لارې راوښوېېدل.
د راجستان د ایالات والي وویل، د خلکو ددغه ناگهاني راښویېدو له آمله ډیر خلک تر پښو لاندې شول.
پر تلویزیون باندې د پیښه ځای ښودل کیږي چې خلک مړي او زخمیان امبولانسونو ته انتقالوي.
تیره میاشت د هند په شمال کې په یوه بل درمسال کې هم خلک تر پښو لاندې شوي وو او ١٥٠ تنه پکې وژل شوي وو.