د ترکیې داستانبول په ښار کې د تازه سیلاونو له امله څوارلس کسان وژل شوي دي. د سیلاونو له امله ډیر خلک په خپلو موټرو کې بند پاتې وو.
حکومتي خبري اژانس اناتولیا خبر ورکړی چې د ښار په اکیټل سیمه کې اوبه درې فوټو ته جگې شوې، او په موټرو کې سپاره خلک د ژغورنې په انتظار د موټرو چتونو ته وختل.
دغه سیلاونه سهار وختي هغه وخت راغلل چې خلک خپلو کارونو ته روان وو او د ښار لارې کوڅې، صنعتي برخه او د یونان په لور لویه لار یې ډوبه کړې وه.