یوی برتانوي ورځپاڼی لیکلی چی چینایی دولتی کمپنی ایران ته تیل ورکوی، چی په دی ډول د امریکا هغه هلی ځلی تضعیفیږی چی غواړی په ایران باندی فشار واچوی چی د خپل اټومی پروگرام نه لاس واخلی.
د لندن د فایننشل ټایمز ورځپاڼې لیکلي چی دغه کمپنی د دلالانو په واسطه د ایران د تیلو د وارداتو دریمه برخه ورته برابروی.
دغه رپوټ د تیلو د یو شمیر سوداگرو او بانکونو له قوله لیکل شوی چی هغوی د خپلو نومونو د یادولو نه ډډه کړې ده.
د دغو کمپنیو دا ډول معاملی به د امریکا په مشری د نړیوالو هغه هلی ځلی کمزورې کړي چی غواړی پر ایران باندې د سختو اقتصادي بندیزونو له لارې دغه ملک په تجرید کې وساتي.
په ایران باندی د تیلو خرڅول کومه غیر قانونی خبره نه ده خو امریکایی چارواکیو وړاندیز کړی چی د ایران سره د نړیوالو په سوداگری باندی بندیز ولگول شی تر څو په ایران باندی فشار واچوی چی د اټومی پروگرام نه لاس واخلی.
لویدیځو ملکونو په ایران تور لگولی چی غواړی اټومی وسله ترلاسه کړی ،خو ایران دغه تورونه رد کړی دی.
د نړی زور واکی ملکونه به دغه موضوعات نن په نیویارک د ملگرو ملتونو د عمومی اسامبلی درشل کې په ضمنی توگه مطرح کړي.