ایټالیوي چارواکو دا خبره رد کړیده چې د طالبانو قوماندانانو او نورو جنګ سالارانو ته یې پیسې ورکړي چې په سیمه کې سوله ټنیګه کړي او پر ایټالیوي قواوو دحملو نه مخنیوی وکړي.
د بریتانیې د ټایمز ورځپاڼې یو خبر خپور کړی و چې په کښي راغلي وه چې د ایټالیا استخباراتي مامورینو هغو یاغیانو ته چې د دوی د قواوو په سیمه کې یې فعالیت کاوه، په لسګونو زره ډالر ورکړي دي.
ورځپاڼه لیکي چې دغې سیمه ته وروسته د ایټالیویانو نه فرانسویان ورغلل او د معاملې نه خبر نه وو او په نتیجه کې د یاغیانو د خوا په یوه حمله کې څو تنه فرانسي عسکر ووژل سول.