د فلپین پوځ وايي د هغو پنځو اندونیزیايي کب نیوونکو د موندلو او ژغورلو عملیات یې پیل کړي دي چې د داعش اړوندې ابو سیاف ډلې تښتولي دي.
د فلپین چارواکو د یکشنبې په ورځ (جنوري۱۹) وویل چې د ابو سیاف ډلې اته اندونیزیايي کب نیوونکي تښتولي وو چې درې تنه یې بېرته پرېښي دي او پنځه نور یې له ځان سره د فلپین جنوبي ولایت سولو ته انتقال کړي دي.
د سولو ولایت په فلپین کې د ابو سیاف یو تر ټولو قوي مرکز بلل کیږي. د فلپین ځواکونو دوه ورځې مخکې هم د ابو سیاف له جنګیالیو سره نښته کړې ده.
عیني شاهدان وایي پوځ هغه کښتۍ هم سوځولې ده چې ګمان کیږي د اندونیزیايي وګړو په تښتولو کې ترې کار اخیستل شوی دی.
د اندونیزیا د بهرنیو چارو وزارت ویلي دي چې د فلپین له حکومت سره په دې اړه نژدې همکاري لري او د خپلو تښتول شویو وګړو په اړه معلوماتو ته منتظر دي.
د ابو سیاف ډله په سمندر کې د لوټ تالان او د یو شمیر تښتول شویو کسانو په وژلو تورنه ده.