افغان قواوو له طالبانو د خوگیاڼیو ولسوالۍ بېرته ونیوله

افغان چارواکي وايي قواوې یې د دوشنبې په ورځ د غزني د شهید ولي محمد خوگیاڼي ولسوالۍ ته ورننوتلې. تر دې یو څو ساعته مخکې دغه ولسوالي د طالبانو په لاس کې لوېدلی وه.

رپوټ وايي چې ددغې ولسوالۍ په سرباندې سخته جگړه وشوله.

افغان چارواکیو وویل چې طالبانو د ولسوالۍ له خوشې کولو نه مخکې یو څو حکومتي ودانیو ته اور اچولی دی.

د طالبانو ویاند ذبیح الله مجاهد دا خبره تصدیق کړله چې طالبانو دغه سیمه خوشې کړېده. هغه دا هم ويلي دي چې طالبانو څو تنه پولیسان او د هغوی وسلې نيولي دي.

د حکومت چارواکي وايي چې د هلمند په ولایت کې افراطیانو دوه ښځې چې د مرستو د یوې غیرحکومتي موسسې لپاره یې کار کاوه وژلي دي.

نور تفصیل:

په عېن حال کې ناټو، د دوشنبې په ورځ وویل ددې قواوو ١٥ افراطیان په هلمند کې هغه وخت ووژل چې د هغوی د اکمالاتو په ډېپو باندې یې برید وکړ.

دغه چارواکي وویل دا عملیات د افغان قواوو په گډون تر سره شول او د عملیاتو په ترڅ کې دوه ورځې ښې سختی جگړی وشولی.

د ایساف نړیوالو قواوو وویل دوی د حقاني د ډلې یو جگپوړه افراطي یا نیولی او یا وژلی دی.

دغه سړي د حقاني د شبکې او طالبانو لپاره په یو لړ عملیاتو کې د هلمند، پکتیا، خوست، پکتیکا او کندهار په ولاېتونو کې کار کاوه.

همدارنگه د یکشنبې په ورځ ناټو وویل دوی ٩٠ تنه یاغیان په هغو درنو جگړو کې وژلي دي چې په تیرو څو ورځو کې د افغانستان په جنوب او ختیځ کې پیښې شوې دي.