امریکایي چارواکي وایي په سوریې کې د بشار الاسد رژیم پای ته رسیدو ته نږدې شویدی او دا چې پدغه هیواد باندې د امریکا او نړیوالې ټولنې لخوا لګول شوي بندیزونه نتیجه ورکوي او هم د هغه هیواد خلکو دیموکراتیکه ارمانونه د پوره کیدو په حال کې دي.
د ختیځې آسیا د هیوادونو لپاره د امریکا د بهرنیو چارو د وزارت مرستیال جیفري فیلډمن پرون د چارشنبې په ورځ د کانګریس د بهرنیو اړیکو یوې جرګه ګۍ ته وویل چې د سوریې د تیلو ذخیرې تقریباً له منځه تللې دي او په امریکا او اروپایي بانکونو کې د سوریې د حکومت شتمني کنګل شویده.
د دمشق حالت
د سوریې د بشري حقونو یوه ډله وایي چې حکومتي ځواکونو د ملک پایتخت دمشق او نورو ښارونو کې په مظاهره چیانو باندې مرګانۍ حملې کړیدي او لږ تر لږه ۱۷ تنه یې وژلي دي.
په سوریې کې د بشري حقونو د څارنې ډلې امریکا غږ ته ویلي دي چې پنځه تنه پرون د چارشنبې په ورځ د دمشق د بارزه په کلي کې هغه وخت ووژل شول چې خلکو د یوه بل مظاهره کوونکي د جنازې په مراسمو کې برخه اخیستې وه.
دغې ډلې همدارنګه ویلي دي چې یو بل تن د دوما په کلي کې د سختې شکنجې نه وروسته ووژل شو.
د بشري حقونو ادراې همدارنګه وایي چې امنیتي ځواکونو د حمس په ښارګوټي کې په خلکو ناتاره ډزې کړیدي او لږ تر لږه ۶ تنه یې وژلي دي.
د دغو وژلو دروغ او ریښتیا پدې خاطر نشي تائید کلی چې سوریه د بهرنیو هیوادونو خبریالان دیته نه پریږدي چې د هغه هیواد نه خبرونه راټول کړي.