په مانامه کې عېنی شاهدان وايي چی امنېتی ځواکونو دوه تنه مظاهره کوونکي وروسته د هغه نن وویشتل چې کوښښ یې کاوه د ښار په یوې لوی څلورلاري کې د دیموکراسۍ د طرفدارو مظاهره کوونکو کمپ ته ځانونه ورسوي.
د بحرین امنیتي ځواکونو نن د پیرل په میدان کې د مظاهره کوونکو د خپرولو لپاره اوښکې بهوونکي گاز استعمال کړ.
د CNN تلوېزون راپور ورکړ چې په مېدان کې د نښتو په وخت د ټوپکو د ډزو اوازونه هم اورېدل کېدل. څو تنه زخمې شوي دي.
نننۍ نښتې یوه ورځ وروسته د هغې وشوې چې پرون د پولېسو او مظاهره کوونکو په منځ کې د نښتو په دوران کی دوه کسان ووژل شول او په سلگونو نور یې زخمي شول.
د بحرین حکومت په ملک کی بېړنی حالت اعلان کړی دی او خپل پوره کوښښ کوی چې اوسنی پاڅون پای ته ورسوي.
د روغتیایي چارو مامورانو وویل چې پولیسو یو سړی د سېټره په ښار گوټي کې وویشته او حکومت وویل چې یو عسکر یوه مظاهره کوونکي په خپل موټر باندې ووهه او مړ یې کړ.
د بحرین دولتي تلویزون وویل چې ددغه هیواد پاچا حماد بن عیسی الخلیفه د وسله والو قواو قوماندان ته امر کړی چې د مظاهره کوونکو په مقابل کې دې پوره او مناسب اقدامات وکړي چې د هغه په وینا غواړي د خلکو ژوند گډوډ کړي او هېواد ته تاوان وروسي.
د بحرین پاچا وړمه ورځ اجازه ورکړه چې ١٠٠٠ تنه د سعودي عربستان عسکر او ٥٠٠ پولیس د متحده عربي اماراتو نه بحرین ته راشي او د دولتي ودانیو امنیت وساتي.