له څو کلونو راهیسې اورو چې د روباتونو عصر راتلونکی دی او ویل کیږي چې کیدای شي ډیر ژر زمونږ کورونو ته لاره ومومي. خو د امریکا په لاس ویګاس کې د تکنالوژۍ د مصرفي اجناسو په لوی کلني نندارتون کې له ورایه معلومیده چې روباتونه په بیلابیلو برخوکې تر اوسه ډیر کوچني قدمونه اخلي. دغه نندارتون د جنورۍ د میاشتې له پنځمې تر اتمې نیټې پورې دوام درلود.
که چیرې تاسو فکر کوئ چې روباتونه د انسان ډوله مخلوقاتو په څېر له تاسو سره په ورځنیو کارونو کې مرسته کوي، نو د اوس لپاره داسې فکر مه کوئ. ښايي څوکاله وخت ونیسي چې دغه تکنالوژي دغه پړاو ته ورسیږي.
که څه هم، یو شمیر ډیر مهم روباتونه په خاصه توګه د ماشومانو د استفادې وړ هغه ،ورو ورو د ودې او پرمختګ په حال کې دي.
برقي جاروګانې دیرې مشهورې ځیرکې وسیلې دي.
د کړکۍ پاکوونکي روباتونه، دومره مشهور نه دي، ځکه د ټولو کورونو کړکۍ د دوی د کار لپاره مناسبې نه دي.
خو بیا هم ډیر لیدونکي یې په لیدو حیران شول، او په حیرت کې شول چې څنګه په ښېښو باندې له لوېدو پرته پورته ځي.
یو شمیر نور روباتونه بیا په هوايي میدانونو او بانکونو کې مشتریانو ته خدمات وړاندې کوي.
د روباتونو یو بل ډیر مهم اړخ د انسانانو لپاره اجتماعي ملګري جوړیدل دي. او خلک ورسره خپل احساسات شریکوي.
یو دلیل چې ولې روباتونه تر اوسه زمونږ کورونو ته نه دي رارسیدلي دادی چې تر ټولو کوچنۍ پرزه یې هم باید داسې ډیزاین شي چې د ډیر سترس په وړاندې مقاومت وکړي.
لیدونکو همدارنګه په سږني نندارتون کې د ماشومانو لپاره جوړه شوې یوه روباتیکه څوکۍ او د ساعتیرۍ لپاره جوړشوي ډول ډول روباتونه ولیدل. انجنیران وايي اوسني روباتونه د نویو تکنالوژیو امتحاني بڼه جوړوي چې به بالاخره روباتونه په کورونو کې د کارونو د کولو لپاره جوګه کړي.