یو هندی عسکر چې په کشمیر کې شپږ ورځې تر یوولسو مېترو واورو لاندې ګېر شوی و، ژوندی ویستل شوی دی.
چارواکي وایي چې د همدې تېرې چارشنبې په ورځ د سیاچین په سیمه کې د هندي عسکرو په یوې پوستې واوره وښوېده او لس عسکر د واورو لاندې شول.
ژغورونکي د څو ورځې راهیسې د ورکو شویو عسکرو پسې ګرځېدل.
د هند د پوځ په اعلامیې کې ویل شوي چې "د دوشنبې په ورځ دغه عسکر پداسې حال کې وموندل شو چې سختې یخنۍ وهلی، د بدن اکسیجن او اوبه یې کم شوي وو خو په هوش کې و او ژوندی دی. "
د اسوشيټټ خبري اژانس وايي ددغه سرتېري نوم،هنامانتپا کوپاډ، دی.
د هند د پوځ قومندان ډګرجنرال هودا وویل چې راتلونکې دوه ورځې دغه سرتېري د ژوند لپاره ډېرې مهمې دي.
هغه وویل " هیله مندیو چې دغه معجزه همداسې روانه پاتې شي. دا رښتیا هم یوه نادره پېښه ده چې یو کس دې دومره ډېر د واور او یخ لاندې ژوندی پاتې وي. "
پیدا شوی عسکر نوي ډيلي کې یو پوځي روغتون ته د درملنې لپاره لېږدول شوی دي خو روغتیايي وضعیت د اندیښنې وړ ښودل شوی.
په خپله د هند صدراعظم نریندرا مودي د هغه د پوښتنې لپاره روغتون ته ورغلی و.
هغه پر خپل ټویټر باندې له ټول هندي ولس نه غوښتنه کړې، چې د سرتېءي، هنامانتپا کوپاډ، د ژوندي پاتې کېدو لپاره دوعاوې وکړې.