په پاکستان کې د پښتنو د تحفظ غورځنګ د سرلاري منظور پښتین "سره خولۍ" په افغانستان کې خورا مشهوره شوې ده.
دا خولۍ د ښار په ګڼو ځایونو کې پلورل کیږي او خلک یې په مینه په سر کوي.
د کابل ښار د پل خشتي مسجد ترڅنګ د خولیو پلورونکی محمد ایوب وايې چې "سرې خولۍ" اوس په درځنونو پلورل کیږي. د ایوب په وینا ددې خولۍ بیه ۲۰۰-۳۰۰ افغانۍ ده.
د ښار د خولیو ځینې پلورونکي وايې چې ددې خولۍ نوم "مزارۍ خولۍ" وه خو اوس یې ډېری خلک د "منظور پښتین خولۍ" بولي.
پلورونکي وایې چې د عامو وګړو ترڅنګ دا خولۍ سیاستوال هم خوښوي.
له تېرو دوو ورځو راپدې خوا د افغانستان د ولسي او مشرانو جرګې رئیسانو او غړو د منظور پښتین خولۍ په سر کړې وه.
د افغانستان په مرکز کابل او هلمند ولایت کې پرلت کوونکي سره خولۍ په سر کوي. ولسونه دا خولۍ د سختدریځۍ پر ضد د مبارزې سمبول بولي.
