د سعودي عربستان چارواکي وایي چې د مکې معظمې په حرم شریف یې د تروریستي برید پلان شنډ کړی دی.
د سعودي عربستان د کورنیو چارو وزارت ویلي چې ددې هیواد امنیتي قواو د جمعې په ورځ د یو مظنون شخص سره وسله واله نښته کړې چې په پای کې دغه وسله وال شخص په یو کور کې ځان منفجر کړی دی.
دوی وایي چې د مکې مکرمې ددغو عملیاتو په نتیجه کې د یوې ښځې په گډون پنځه تنه د ترهگریزو اعمالو په ارتباط نیول شوي دي.
د سعودي د کورنیو چارو وزارت ویلي چې پر مسجد الحرام باندې برید د دریو ترهگرو ډلو له خوا طرحه شوی و چې دوه یې په مکه او دریمه یې په جده کې میشت وې.
له بلې خوا د ایران د بهرنیو چارو وزارت چې سعودي سیمه ایز سیال هیواد دی پر مسجد الحرام باندې د تروریستي برید پلان سخت غندلی دی.
سعودي چارواکي وایي په دغه چاودنه کې د پنځو عسکرو په ګډون ۱۱ کسان ژوبل شوي دي.