د نیوزلنډ حکومت په افغانستان کې د خپلو پوځي روزونکو د ماموریت موده درې میاشتې نوره هم وغځوله.
چارواکي وایي ښايي د ۲۰۱۸ کال د سپتمبر په میاشت کې افغانستان کې د خپلو دغو پوځي مشاورانو د پاتې کېدو او نه پاتې کېدو په اړه پرېکړه وکړي.
د نیوزلند لومړۍ وزیرې جسندرا اردیرن د دوشنبې په ورځ (جون۱۱) د کابینې له غونډې وروسته دا اعلان وکړ.
هغې وویل چې د درې میاشتې مودې په غځېدو سره به حکومت ته نور هم وخت ورکړل شي چې د افغانستان د ماموریت او په دغه ماموریت پورې تړلیو نورو اړوندو مسایلو باندې غور او پرېکړه وکړي.
نیوزلند له ۲۰۰۱ راهېسې د ناټو په چوکاټ کې په افغانستان کې د ترهګرۍ پر ضد مبارزه کې دخیل دی او له دغې مودې راهېسې یې شاوخوا ۳۵۰۰ سرتېري افغانستان ته استولي دي چې په ماموریت کې برخه واخلي.
د نیوزلنډ "پرونیوزروم" ویپاڼه وايي دا مهال یوازې ۱۱ نیوزلنډي روزنکي په افغانستان کې دیره دي چې افغان ځواکونه روزي او سلا مشورې ورکوي.
د نیوزلنډ سرتېري تر ډېره د بامیان په ولایت کې دیره وو. د افغانستان په جنګ کې لږ ترلږه د نیوزلنډ ۱۱ سرتېري وژل شوي دي. دا مهال د افغانستان عملیاتي چارې افغان ځواکونه مخ ته وړي خو بهرني ځواکونه ورته سلا مشورې ورکوي.
په ۲۰۱۴ کال کې د عملیاتو مشري افغان ځواکونو واخیسته.
