پاکستاني چارواکي وايي چی د پنجشنبې د ورځې راهیسي د آمریکا بې پیلوټه الوتکې د شمالي وزیرستان په قبایلي سیمه کې څو حملې کړي دي چې په کې د ۱۷ نه زیات مشکوک یاغیان وژل شوي دي.
امنیتي چارواکي وايي چې نن د جمعې په ورځ دیاغیانو په ځایونو باندي د بې پیلوټه الوتکې په دوو جلا جلا حملو کې ۱۴ کسه ووژل شول.
دغه راز چارواکي وايي چې د پنجشنبې په ورځ هم د مرانشاه په ښارګوټي کې په ورته حملو کې ۳ یاغیان وژل سوي وو.
د آمریکا جمهور ریْس بارک اوباما د افغانستان او پاکستان په سرحدي قبایلي سیمو کې د القاعدې او طالبانو په ځایونو باندي د بې پیلوټه الوتکو حملې زیاتې کړي دي.
د پاکستان حکومت ددغو حملو سره مخالفت ښيي او وايي چې دغه راز حملې د دغه ملک خپلواکۍ ته صدمه رسوي.