څه موده مخکې د جنوبي کوریا د اساسي قانون محکمې هغه په فساد محکومه کړi وه او واکونه او صلاحیتونه یې ترې واخیستل.
پارک ګیون هی د یکشنبې په ورځ د جنوبي کوریا د جمهوري ریاست له زرغونې ماڼۍ څخه هم کډه وکړه.
د ۲۰۱۶ کال د ډسمبر په میاشت کې د جنوبي کوریا د پارلمان غړو پر هغې تور ولګوه چې د خپل یو باوري کس له لارې یې له ځینو خصوصي شرکتونو څخه بډې اخیستې او همدغه کس ته یې په دولتي چارو کې د پټو لاسوهنې واک هم ورکړی دی.
د اساسي قانون محکمې د دغو تورونو له پلټنو وروسه هغه معزوله کړه.
کله چې هغه له جمهوري ریاست څخه وتله، سلګونه پلویان يې د جنوبي کوریا بیرغ او د هغې تصویرونه په لاس د هغې د کور په شاوخوا کې را ټول شوي وو.
هغه ښايي د بډې اخیستو، له واکه د غلطې استفادې او ځینو نورو تورونو سره هم مخامخ شي.
میرمن پارک د جنوبي کوریا د اساسي قانون له پرېکړې وروسته کومه خبره نه وه کړې خو یوازې د خپل ملګري، چوی سون سیل، په اړه یې بخښنه غوښتې وه. اوس باید د جنوبي کوریا خلک د همدغه کال تر مۍ پورې خپل نوی ولسمشر/ولسمشره وټاکي.
وروستۍ نظر پوښتنې ښيي چې د میرمن پارک لیبرال سیال، مون جي ان، په خلکو کې ډېر محبوبیت لري. هغه په ۲۰۱۲ کال په ټاکنو کې هم د میرمن پارک سر سخت سیال و.