د سوریې په الباب کې د سوریې د حکومت د مخالفانو په یوې امنیتي پوستې ځانمرګي برید لسګونه کسان ووژل.
د ترکیې ځواکونو او ایتلافیانو یې یوه ورځ مخکې له داعش نه د دغه ښار ډېرې برخې ونیولې.
د ترکيې د انادولو خبري اژانس وايي په برید کې شاوخوا ۶۰ تنه وژل شوي او ۱۰۰ نور ژوبل دي. خو سي ان ان په حلب کې د چارواکو له خولې راپور ورکړی چې په برید کې د ۵۳ او ۶۰ ترمنځ کسان وژل شوي دي.
په برتانیا کې مېشته د سوریې د بشري حقونوڅار ډله وايي چې برید ولسي خلک او هغه جنګیالي په نښه کړل چې له داعش سره جنګیږي. یو شمېر نور خلک ژوبل شوي هم دي.
برید د الباب ښار د سوسیان په کلي کې شوی دی. د سوریې د بشري حقونو د څار ډله باور لري چې داعش دا برید کړی دی.
د ترکیې ځواکونو د خپلو ایتلافي ملګرو په مرسته د پنجشنبې په ورځ د داعش جګړه ماران د دغه ښار له ډېرو برخو وشړل، دا ښار د داعش قوي مرکز بلل کیږي.
په سوریې کې له څو کلونو راهېسې جنګ روان دي، چې میلیونه خلک په کې وژل شوي، ژوبل شوي او کډوال شوي دي.