د امریکا په ملاتړ د کردانو او عربانو ایتلافي قواو د سورېې په شمال کې د رقه په سیمه کې د داعش خلاف عملیات پیل کړیدي. رقه په سوریه کې د داعش چې ځانته د اسلامي دولت ډله هم وايي ، د خلافت مرکز بلل کیږي.
د کردي او عرب جنگیالیو دغه ځمکني عملیات په داسې وخت کې پیلیږي چې دې نه مخکې د امریکا د پوځ یو لوړرتبه قوماندان جنرال جوزف وټل سیمې ته سفر کړی و، جنرال وټل د امریکا په مرکزي قوماندانۍ کې د سورېې چارې اداره کوی. جنرال وټل ویلي دي چې ده د کردانو او عربو د ایتلاف د قوماندانانو سره لیدلي او معلومه کړې یې ده چې دوي قابل او د اعتبار وړ ملگري دي.
بلخوا په واشنگټن کې د سه شنبې په ورځ د امریکا د بهرنیو چارو د وزارت ویاند مارک ټونر د خبریالانو سره په خبرو کې ویلي دي چې سورېې ته د جنرال جوزف وټل تگ د سورېې په اړه د امریکا د پلان یوه برخه ده.
ښاغلي ټونر ویلي دي چې ترڅو چې د سورېې د مسئلې یو سیاسي حل نه وي پیدا شوی ، نو تر هغې به هلته د امنیت مسئله سخته وي او د داعش ډله به هم خوندي او مصئون ځایونه لري. همداراز د سیمه ایزو چارو کارپوه زبیر اقبال چې په واشنگټن کې د منځني ختیځ د انسټوییټ سره کار کوي وايی چې دی نه پوهیږي چې د کرد او عرب جنگیالیو دغه گډ عملیات د څه مقصد دپاره کیږي. بل دا چې دا عملیات به د ترکېې سره د امریکا په اړیکو باندي څه اغیزې ولري. ځکه چې ترکیه د کردانو سره مخالفه ده او نه غواړي چې کردان ورنه خپلواکي واخلي.
ښاغلی زبیر وايي چې دی فکر نه کوي چې د داعش ملا ماتول به په سورېه کې ثبات ته څومره گټه ورسوي. ځکه چې ترڅو هلته سیاسي کړکیچ نه وي ختم شوي دا بحران به همداسې روان وي.