د جاپان د موټر جوړونې تر ټولو غټ شرکت ویلي دي چې مازده سره په ګډه په متحده ایالاتو کې د یو عشاریه شپږ ملیارده ډالرو په ارزښت د موټر جوړونې شرکت جوړوي.
تمه کیږي چې دغه شرکت د جوړیدو کار به په ۲۰۲۱ میلادي کال کې بشپړ شي او په کال کې به ۳ سوه زره موټر جوړوي. مازده او ټویوټا ویلي دي چې پدې شرکت کې به څلور زره کسانو ته کار روزګار پیدا شي.
د ټویوټا د شرکت رئیس اکیو ټویوډا په یوې اعلامې کې ویلي دي چې " دواړه شرکتونه په ګډه پلان لري چې تر پخوا ډیر ښه موټر جوړ کړي."
ټویوټا او مازده ویلي دي د ګډ کار له برکته به هغوي وکړی شي چې د برقي موټرو په ګډون داسې موټر جوړ کړي چې په نوې ټکنالوژۍ سمبال وي.
پدې شرکت کې به د ټویوټا شرکت د مازده د شرکت پنځه په سلو کې ګټه اخلي او په بدل کې به یې د مازده شرکت ته د ټویوټا د شرکت صفر عشاریه دوه پنځه په سلو کې برخه ورکړل شي.
د امریکا جمهور رئیس ډونالډ ټرمپ د جمهوري ریاست د انتخاباتي مبارزو پر وخت د ټویوټا شرکت ته خبرداری ورکړی و چې ولې یې شرکت په مکسیکو کې جوړ کړی او د امریکا د خلکو کارونه یې بهر وړي دي.
ښاغلي ټرمپ پخپل ټویټر کې لیکلي دي چې دا د "امریکايي تولیداتو لپاره یوه ستره پانګه اچونه ده."