پاکستان پرون د پنجشنبې په ورځ د هغه پاکستاني ډاکټر د بندي کیدو له کبله د امریکا انتقاد رد کړی دی چي د اسامه بن لادن په پیدا کولو کي یې د امریکا سره مرسته کړې وه.
د امریکا د کانګرس یوې کمیټې ددې مسالې له کبله د احتجاج په توګه پاکستان ته د امریکا مرستي بندي کړې.
د پاکستان د خیبر پښتونخوا د قبایلي سیمي یوې محکمې په ډاکټر شکیل افریدي باندي د ملي خیانت جرم ولګاوه او د ٣٣ کالو بند سزا یې پر راوایستله. په هغه باندي دا تور ولګول سو چي د واکسین کولو جعلي فعالیت یې پیل کړی و چي له دې لاري د القاعدې د مشر او د هغه د کورنۍ د غړو د ( ډي این اې ) سمپلونه برابر کړي او
( سي آي اې ) ته یې ورکړي او دا معلومه کړي چي هغه د پاکستان د اېبټ آباد په ښار کي ژوند کوي.
د امریکا خاصو قواو بن لادن د تیر کال د مې په میاشت کي وواژه.
د پاکستان د بهرنیو چارو د وزارت یوه نطاق ( معظم احمد خان ) پرون خبریالانو ته وویل چي " د افریدي دوسیه به د پاکستان د قوانینو په اساس او د پاکستان د محکمو له خوا حل و فصل شي. "
پرون د امریکا د مشرانو د جرګې یوې کمیټې فیصله وکړه چي په ډاکټر شکیل افریدي باندي د ٣٣ کالو بند د سزا را ایستلو له کبله پاکستان ته د مالي مرستو نه ٣٣ ملیون ډالره را کم کړي او په دې ډول به په دغو ٣٣ کالو کي هر کال یو یو ملیون ډالره کم ورکول کیږي.
سناتور ( کارل لیوین ) او سناتور ( جان میکېن ) پرون وغوښتل چي دغه ډاکټر دي سمدستي عفوه سي. هغوي په یوه ګډه بیانیه کي په افریدي باندي ددې سزا را ایستل " ټکان خوړونکی او د قهر او سپکاوي وړ" کار وباله او ویې ویل چي د بن لادن په پیدا کولو کي د هغه مرسته « یو زړه ور، قهرمانه او وطنپال اقدام و. "
بل پلو
د پاکستان د استخباراتو مامورین وایي چي د امریکا د بې پیلوټه الوتکي په حمله کي چي د افغانستان سره په سرحدي قبایلي سیمه کی یې وکړه، لس تنه تر شک لاندي یاغیان وژل شوی دي.
دغو چارواکو وویل چي بې پیلوټه الوتکي پرون د پنجشنبې په ورځ په( میران شاه ) کي د یاغیانو په یوه ځاي باندي دوه راکټونه وغورځول.
دا حمله یوه ورځ وروسته له هغه کیږي چي چارواکو وویل د بې پیلوټه الوتکي په حمله کي چي هغه هم په دې سیمه کي وسوه، څلور یاغیان ووژل سول.
پاکستان غوښتي دي چي په خاوره کي یې د بې پیلوټه الوتکو حملې ختمي شي. مګر امریکا وایي چي دا حملې چي پریاغیانو باندي کیږي ددې لپاره ضروري او ډیري مهمي دي چي القاعده او طالبان ماته وخوري.