د امریکا متحده ایالاتو د چهارشنبې په ورځ د اردن سره یو موافقه لاس لیک کړه چې له مخې به یې امریکا هر کال اردن سره د څه دپاسه یو میلیارد ډالر مرسته کوي.
ددغه موافقې له مخې چې د امریکا د متحده ایالاتو د بهرنیو چارو وزیر ریکس تیلرسن او د اردن د بهرنیو چارو وزیر ایمان سفادي لاس لیک کړه، امریکا ژمنه کړې چې هر کال به د ٢٠١٨ نه تر ٢٠٢٢ پورې د اردن سره ١،٣ میلیارد ډالر مرسته کوي.
ددغو پیسو له جملې نه ٧٥٠ میلیونه ډالر یې اقتصادي او ٣٥٠ میلیونه ډالر یې پوځي مرستې دي.
له بلې خوا د اردن پاچا ملک عبدالله نن وویل چې هیواد یې د زیات شمیر سوري مهاجرو د ورتگ په وجه له بد اقتصادي حالت سره مخامخ دی او د هغه په وینا دا پدې خاطر دي چې نړۍ اردن له پامه غورځولی دی.
ملک عبدالله روسیې ته د سفر په درشل کې د تاس اژانس سره په مرکه کې دا هم وویل چې د سوریې په جنوب کې د اردن او روسیې گډ کار سیمه باثباته کړې او اوس ددې وخت دی چې د سوریې اوه کلنۍ کورنۍ جگړې ته د سیاسي حل لارې لپاره هڅې گړندی شي.
د امریکا متحده ایالات د نړۍ د بل هر یو هیواد په پرتله د اردن سره مرسته زیاته کړې چې د ١٩٥١ کال راهیسې یې دې هیواد ته څه دپاسه ٢٠ میلیارد ډالر ورکړي دي.
اردن چې اقتصاد یې د گاونډي هیواد سوریې او د عراق د جگړې په وجه په ځانگړې توگه د زیات شمیر مهاجرو په ورتگ سره خراب شوی همداشان د اروپایي ټولنې او سعودي عربستان نه مرستې ترلاسه کوي. اردن وایي د سوریې د کړکیچ په وجه ورته ١٠ میلیارډ ډالره تاوان رسیدلی دی.
په اردن کې اوس مهال ٦٥٠٠٠٠ زره سوري مهاجر اوسیږي چې د کورنۍ جگړې په وجه د هیواد پریښولو ته اړ شوي دي. همداشان ٧٠٠٠٠٠ زره نور سوري وگړي هم په اردن کې ژوند کوي چې له جگړې دمخه دغه هیواد ته تللي دي.