د لاس رسي وړ اتصالات

پاکستان د آصف زرداري پر وتلو بندیز ولګاوه


ښاغلي زرداري په غبرګون کې دغه ټول تورونه بې بنسټه بللي

پخوانی پاکستانی ولسمشر د پیسو د سپینولو او جعلي بانکي حسابونو د لرلو په تور ممنوع الخروج شوی دی.

د پاکستان حکومت ددې هیواد پخوانۍ جمهور رئیس، آصف علي زرداري د نامشروع پیسو په سپینولو او د جعلي بانکي حسابونو د لرلو په تور له دې هیواده ممنوع الخروج اعلان کړ.

د پاکستان د اطلاعاتو وزیر، فواد چوهدري په اسلام آباد کې خبریالانو ته وویل چې آصف علي زرداري او د هغه خور”فریحه تالپور“ د هغو ۱۷۲ کسانو په لست کې دي چې د جعلي بانکي حسابونو او د پیسو د سپینولو تورونه پرې لګیدلي دي.

زرداري له کال ۲۰۰۸ څخه تر ۲۰۱۳ پورې د پاکستان جمهور رئیس پاتې شوی و او دا مهال د پاکستان د خلکو د ګوند په مشرانو کې دی. پر ښاغلي زرداري پخوا هم د فساد تورونه شوي و.

ښاغلي زرداري په غبرګون کې دغه ټول تورونه بې بنسټه بللي او د پاکستان اوسنۍ حکومت یې د ”پوځ لاسپوڅی“ ګڼلی.

یوه اونۍ وړاندې د پاکستان پخوانی لومړی وزیر نوازشریف هم د مالي فساد په تور د اوو کلونو په بند باندې محکوم شوی و.

په زرداري باندې دغه تورونه په داسې ورځ لګول کیږي چې ”د پاکستان دخلکو ګوند“ د دغه ګوند پخوانۍ مشرې بینظیر بهوټو د مړینې یوولسمه کلیزه نمانځله.

XS
SM
MD
LG