په چین کې چارواکي وايي چې د دغه هېواد په جنوب کې د لویې لارې د یوې برخې د نړېدو له کبله ۳۶ تنه مړه شوي دي.
پېښه د چین په جنوبي ولایت ګوانګدانګ کې شوې ده.
د فرانسې خبري اژانس د چین د دولتي رسنۍ سینهوا په قول لیکلي دي: «د مۍ تر دویمې (حمل۱۳) نېټې پورې (ځايي وخت د سهار ۵:۳۰) په دغې پېښې کې ۳۶ تنه مړه شوي او ۳۰ تنه نور ژوبل دي.»
په راپور کې ویل شوي دي چې د زخمیانو وضعیت ښه دی.
دا لویه لاره د ګوانګدانګ ولایت د میزو ښار او دابو ولسوالۍ ترمنځ ده.
مقامات وايي چې ۲۰ موټرونه د ویجاړې شوې لارې ژورې برخې ته ګوزار هم شوي دي.
د چین دولتي رسنۍ وايي چې دا یوه طبیعي جیولوژیکي پېښه ده چې د سختو بارانونو له کبله رامنځ شوې ده.
د ګوانګدانګ ولایت یو پرنفوسه صنعتي ولایت بلل کېږي چې په دې وروستیو کې په کې د زیاتو بارانونو له کبله په ځینو سیمو کې قوي سیلابونه وتلي او ځمکې هم ښویدلي دي.
په چین کې د کال په اوسني موسم کې دا ډول شدید بارانونه معمول نه بلل کېږي او کارپوهان یې د اقلیم د بدلون له کبله بولي.
فورم \ دبحث خونه