مقامات وایي په ٢٠١٨ کال په ننگرهار، کونړ او لغمان ولایتونو په فعالو ۲۵۰ فارمونو کې ٦٠٠ ټنه کبان تولید شوي دي.
د افغانستان د ختیځ زون د کرهڼې مقامات وایي د کبانو د روزنې او تولید ١٨٣ فارمونه په ننگرهار کې، ٥٥ په لغمان او ١٢ په کونړ ولایت کې فعالیت لري.
ددغو فارمونو فعالیت د کبانو له غوښې سره د سیمې د خلکو د مخ په زیاتیدونکې علاقې ښکارندوی دی. د ننگرهار د کرهڼې او مالدارې ریاست د فارمونو مسؤل سید نادر د امریکا غږ ته ویلي چې پدې دریو ولایتونو کې موجودو فارمونو په تیر کال کې ٦٠٠ ټنه کبان بازار ته عرضه کړي دي.
ښاغلی نادر وایي له پاکستان نه د کبانو صادرات په قانوني توگه منع شوي خو بیا هم د قاچاقي لارو ماهیان جلال آباد ته واردیږي. د ننگرهار د کرهڼې ریاست د فارمونو مسؤل وایي د ننگرهار ١٨٣ راجستر شوي فارمونه په کال کې شاوخوا ۴۵۰-۶۰۰ ټنه کبان تولیدوي. هغه وایي سږکال یې د نړیوال بانک په بودجې او ددې ریاست په تخنیکي مرستې د کبانو د تولید یوه دستگاه جوړه کړې چې له همدې ځایه نورو ولایتونو ته هم د ماهیانو نسل استول کیږي.
د لغمان د کرهڼې او مالدارۍ رئیس انجینر محمدجمیل خوشحال وایي پدې ولایت کې ٥٥ فارمونه شته چې په کال کې ١٣ ټنه کبان بازار ته وړاندې کوي.
همداشان د کونړ ولایت د کرهڼې او مالدارۍ رئیس انعام الله صافی وایي چې پدې ولایت کې د کبانو ١٢ فارمونه فعالیت لري چې په وینا یې هر کال شاوخوا ۴٠ ټنه کبان بازار ته عرضه کوي. ښاغلي صافي د کبانو د نسل د تولید د ماشین د نشتون نه سرټکوي او وایي چې په همدې دلیل د کبانو نسل او بچي له پاکستان نه واردیږي.
د ختیځ زون د فارمونو خاوندان وایي چې په زرگونو کسان له دوی سره د کبانو په تولید کې په کار بوخت دي او له دولت غواړي چې د کبانو د نسل د تولید ماشینونو مرسته ورسره وکړي.
خو له بلې خوا د کبانو د خوراک مینه وال د لوړو بیو نه سرټکوي او وایي چې هر څوک یې د اخیستلو توان نلري.
په ختیځ زون کې د ننگرهار د بهسودو پل او درونټه، په کونړ کې د چوکۍ ولسوالۍ او د اسعدآباد ښار او د کابل ولایت مربوط سروبي او نغلو د کبانو د خرڅلاو ښه بازارونه دي.
رپوټ: ضیاالرحمن حسرت