نیوزیلنډ د سه شنبې په ورځ اپریل ۳۰ (غوايي ۱۱) اعلان وکړ چې د افغانستان سره د سپتمبر په میاشت کې د کرکټ یوه ټسټ لوبه کوي. له دې یوه میاشت وړاندې، استرالیا له افغانستان سره د ۲۰ اوریزو سیالیو یوه لړۍ ځنډولې وه.
د استرالیا کرکټ بورډ د اګست د میاشتې د پاره د پلان شوې درې لوبو لړۍ د ځنډولو لامل په افغانستان کې له ښځو سره د طالبانو ناوړه چلند وښود.
دا دریم ځل وو چې د ۲۰۲۱ کال راهیسې، له نړیوال جام بهر استرالیا له افغانستان سره د کرکټ لوبه کول لغوه کوي.
د افغانستان او نیوزیلنډ ترمنځ د ټسټ لوبې د پاره تراوسه ځای نه دی ټاکل شوی.
نیوزیلنډ په ویسټ انډیز کې د ۲۰ اوریزو لوبو په راروان نړیوال جام کې خپله لومړۍ لوبه له افغانستان سره لري.
نیوزیلنډ کرکټ بورډ وویل چې له افغانستان سره د ټسټ لوبې کولو پرېکړه د بورډ او لوبغاړو د ټولنې په کچه شوې ده.
د نیوزیلنډ د کرکټ بورډ ویاند ریچارډ بوک په یوې خبرپاڼې کې وویل: "په دې نظر توافق وشو چې د لوبو ځنډول او منزوي کول په افغانستان کې وضعیت نه بدلوي. دا به ډیره اغیزمنه وي چې د مذاکراتو او په لوبو کې د ګډون لار پرانیستې وي او په عین وخت کې د بدلون لپاره جدي غوښتنه جاري وساتل شي."
په وروستي نړیوال جام کې د کرکټ ځینو سترو ټیمونو ته له ماتې ورکولو وروسته، په افغانستان کې د کرکټ محبوبیت زیات شوی دی.
خو د طالبانو په واکمنۍ کې ښځې په دغه لوبه کې له ګډون څخه په قطعي ډول منع شوي دي.
افغانستان خپلې نړیوالې لوبې زیاتره وخت د متحده عربي اماراتو او نورو دریمګړو هېوادونو په لوبغالو کې ترسره کوي.
د نیوزیلنډ کرکټ بورډ په خبرپاڼه کې ویل شوي: "د نیوزیلنډ کرکټ بورډ په دې باور دی چې کرکټ د ټولو لوبه ده او غواړي چې په لنډ راتلونکي کې په افغانستان کې په لوبو کې د ښځو د ګډون د پاره ملاتړ زیات شي."
فورم \ دبحث خونه