ټاکل شوې وه، چې اجرايي رئیس عبدالله عبدالله د پاکستان د لومړي وزیر نواز شریف په بلنې، د مۍ په دویمه او درېیمه پاکستان ته ولاړ شي.
خو، ښاغلي عبدالله په خپل ټویټر کې لیکلي، چې د کابل د ننني برید په اړه د لومړنیو شواهدو له موندلو وروسته یې اسلام اباد ته خپل پلان شوی سفر وځنډوه.
ښاغلي عبدالله نه په ښکاره ویلي نه دي، چې پاکستان دې په دغه برید کې ښکیل وي، خو د هغه ویاند مجیب الله رحیمي د امریکا غږ اشنا ته وویل چې، لومړني شواهد ښيي، په پاکستان مېشتو ترهګرو ډلو دا حمله کړې او یا یې په پاکستان کې تنظیم کړې ده.
طالبانو، د ملي امنیت پر یوې څانګې د دغه ځانمرګي برید مسولیت اخیستی دی، چې په کې شاوخوا ۳۰ تنه ووژل شول او ۳۳۰ نور ژوبل شول.
له برید سمدستې وروسته د پاکستان لومړي وزیر نواز شریف افغان حکومت ته په یو استول شوي پیغام کې دغه برید په کلکه وغنده او د قربانیانو له کورنیو سره یې خواخوږي وښوده.
افغان حکومت په وار وار پاکستان د طالبانو په ملاتړ او له هغوی سره په همکارۍ تورن کړی، خو پاکستان یې نه مني.