د لاس رسي وړ اتصالات

ولسمشر غني له بروکسل څخه ډک لاس کابل ته راستون شو


نړیوالې ټولنې په بروکسل غونډه کې تر ۲۰۲۰ میلادي کال پورې له افغانستان سره څه باندې ۱۵ میلیارد ډالر مرستې ژمنه وکړه.
نړیوالې ټولنې په بروکسل غونډه کې تر ۲۰۲۰ میلادي کال پورې له افغانستان سره څه باندې ۱۵ میلیارد ډالر مرستې ژمنه وکړه.

د افغانستان ولسمشر د بروکسل په غونډه کې د نړیوالې ټولنې د ۱۵.۲ میلیارد ډالرو مرستو د ژمنې له ترلاسه کولو وروسته، نن سهار کابل ته راستون شو.

د چهارشنبې په ورځ د بلجیم په پلازمینې بروکسل کې، له اویاو څخه د زیاتو هیوادونو مشرانو او شلو نړیوالو ادارو تر ۲۰۲۰ میلادي کال پورې د افغانستان د انکشافي لومړیتوبونو په برخه کې د ۱۵.۲ میلیارد ډالرو مرستې ژمنه وکړه.

له ارګ څخه په یوې خپرې شوې اعلامیې کې راغلي، چې د افغانستان ولسمشرمحمد اشرف غني پرون ماښام د بروکسل کنفرانس پای کې د اروپایي ټولنې مرستیالې او د بهرني سیاست مسوولې مېرمن فیدریکا موګریني سره په ګډه خبري ناسته کې ګډون وکړ او د بروکسل د غونډې نتایج یې د افغانستان او نړیوالې ټولنې لپاره د قناعت وړ وبلل.

د اعلامیې له مخې، په دغې خبري ناسته کې ولسمشر غني د بروکسل د غونډې د بریالیتوب لامل د افغان حکومت او اروپایي ټیمونو د ګډ کار او نه ستړي کېدونکو کوښښونو نتیجه بللې ده.

آغلې موګرینې وویل، چې د بروکسل غونډې له افغانستان څخه د نړیوالې ټولنې پراخ ملاتړ څرګند کړ، تر څو په قوي، پایداره او ښه توګه د افغانستان د خلکو تر څنګ ودریږي.

آغلې موګریني د خپلې وینا په یوه برخه کې وویل "د افغانستان د خلکو د ملاتړ او پیاوړتیا په برخه کې پانګونه په حقیقت کې په بین المللي ثبات کې پانګونه ده".

د افغانستان ولسمشر په دې غونډه کې ژمنه کړې، چې له نړیوالې ټولنې سره د خپلو ژمنو د عملي کولو لپاره به نن لاس په کار شي.

ولسمشر غني وویل "د نړېوالې ټولنې له تازه ژمنو سره به د افغانستان د لوري کار سبا پیلېږي او د ډاډ وړ پرمختګ، قابلیت، حرکت، امانتداري او شفافیت د دې پروسې د پرمخ بېولو لاملونه دي".

د افغانستان د ولسمشر دویم مرستیال محمدسرور دانش، د بروکسل د غونډې له پای ته رسیدو وروسته، په یوې اعلامیې کې ویلي، چې د بروکسل په غونډه کې د نړېوالې ټولنې پریکنده او هراړخیز ملاتړ د دې ترڅنګ چې افغانانو ته د یو روښانه راتلونکي زیری ورکوي، د افغان دولت پر اوږو یې درانه مسؤولیتونه هم ایښي دي.

ښاغلي دانش ټینګار کړی، چې د ملي یووالي حکومت باید په جدي توګه د خلکو د هوساینې او په ټولو برخو کې د اصلاحاتو راوستلو او د خپلو ژمنو د عملي کولو لپاره کار وکړي.

په اعلامیې کې د ولسمشر د دویم مرستیال له قوله لیکل شوي، چې د ملي یووالي حکومت باید له برابر شوو فُرصتونو څخه په سمه توګه او زیاته ګټه پورته کړي.

XS
SM
MD
LG