د امریکا یوه خصوصي فضايي بیړۍ د پنجشنبې په ورځ فبروري ۱۵ (سلواغې ۲۶) د فلوریډا د کینیډي فضايي مرکز څخه د سپوږمۍ په لور وتوغول شوه.
دا د یو خصوصي شرکت له لوري سپوږمۍ ته د تګ دوهمه هڅه ده. لومړۍ هڅه د جنوري په میاشت کې ناکامه شوې وه.
د "IM-1" په نوم دا فضايي بیړۍ د ټکزاس ایالت په "اینټوویټیو ماشینز" شرکت پورې اړه لري. ټاکل شوې ده چې دا لومړنی خصوصي شرکت شي چې فضايي بیړۍ یې د سپوږمۍ په سطحه کښیني.
سپوږمۍ ته د تګ د امریکا د اپولو ماموریت پنځه لسیزې وروسته، ټاکل شوې چې دا بیړۍ یو روباټ هم سپوږمۍ ته ولېږدوي.
دا بیړۍ په ځايي وخت د پنجشنبې د سهار په ۱:۰۶ بجو د سپېس ایکس شرکت د فالکن-۹ راکټ په مرسته وتوغول شوه او ټاکل شوې ده چې د فبروري په ۲۲مه د سپوږمۍ د جنوبي قطب په ۳۰۰ کیلومترۍ کې کښیني.
ناسا هڅه کوي چې په سپوږمۍ کې د اوبو لټون وکړي او په راتلونکي کې مریخ ته د تګ په لار کې، سپوږمۍ د تمځای په توګه وکارول شي.
د امریکا فضايي ادارې (ناسا) په دغه بیړۍ کې سپوږمۍ ته د ساینسي څېړنو د وسایلو د لیږدولو په بدل کې د "اینټوویټیو ماشینز" شرکت ته ۱۱۸ میلیون ډالر ورکړي دي، ترڅو سپوږمۍ ته د ستورمزلو د تګ په وړاندې د ممکنه خطرونو په اړه روڼتیا رامنځته کړي.
ټاکل شوې ده چې دغه ستورمزي له ۲۰۲۶ وروسته سپوږمۍ ته لاړ شي.
وروستی ماموریت د ناسا د هغو هڅو برخه بلل کیږي چې سپوږمۍ ته د وسایلو د لیږدولو چاره خصوصي سکتور ته وسپاري او سپوږمۍ ته د تګ راتګ په برخه کې اقتصادي بازار وده وکړي.
تر اوسه پنځه هېوادونه توانېدلي چې د سپوږمۍ سطحې ته فضايي بیړۍ ورسوي او امریکا یوازنی هېواد دی چې ستورمزلو یې پر سپوږمۍ پل ایښی دی.
فورم \ دبحث خونه