د پاکستان پوځ د سه شنبې په ورځ مۍ اوومه (ثور۱۸) وویل چې د مارچ په میاشت کې په پاکستان کې په چینايي انجینرانو باندې برید په افغانستان کې پلان شوی و او بریدګر هم افغان و.
هغه وخت یو ځانمرګي د چینايي انجینرانو په موټر ځان والوځوه او شپږ تنه یې ووژل. دغو انجینرانو د پاکستان په شمال لویدیځ کې د اوبو د بند په یوې پروژې کې کار کاوه.
د پاکستان پوځ ویاند تورن جنرال احمد شریف خبریالانو ته وویل: «ټول برید په افغانستان کې پلان شوی و، په برید کې کارول شوی موټر هم په افغانستان کې چمتو کړل شوی و او ځانمرګی هم افغان و.»
رویټرز خبري اژانس وايي چې د پاکستان د پوځ د ویاند د دغو څرګندونو په اړه یې په افغانستان کې له طالب مقاماتو سره تماس ونیوه، خو هغوی لا په دې اړه کومه تبصره نه ده کړې.
د افغان طالبانو او اسلام اباد ترمنځ روابط په دې وروستیو خراب شوي دي. پاکستاني مقامات ادعا کويچې افغان طالبان د هغو ترهګرو ډلو په ضد کافي اقدامات نه کوي چې په پاکستان کې بریدونه کوي.
پاکستاني چارواکي همدغه راز تور لګوي چې د افغان طالبانو په حکومت کې ځینې کړۍ شته چې د پاکستان طالبانو ننګه کوي. پاکستاني طالبانو له افغان طالبانو سره همفکره دي. خو په کابل کې ناست واکمن طالبان د پاکستان دا تورونه ردوي.
فورم \ دبحث خونه