نن سبا پر اروپا باندې د نړۍ د سختې ګرمۍ لویه څپه را ماته شوې ده. د صحارا له دښتې څخه راغلې د تودوخې دا پراخه او پیاوړې څپه د اروپا پر ټولې وچې خپره شوې او د جون میاشتې لپاره یې تودوخه بېساري او ریکارډ ماتونکې کچې ته رسولې ده.
فرانسې کې وضعیت ډېر جدي دی. د هېواد نیمایي سیمې د ګرمۍ د «جدي خبرداري» لاندې دي، چې د خلکو ژوند ته د جدي خطر معنا لري.
تمه کېږي چې د هېواد په سوېل لوېدیځ او د بوردو په شاوخوا سیمو کې تودوخه له ۴۲ سانتيګراد درجې څخه هم واوړي.
په پاریس کې هم د ۴۰ درجې سانتيګراد تودوخې اټکل شوی، چې د جون میاشتې پخواني ریکارد یې مات کړی.
د دې وضعیت له امله چارواکو په بهر کې غونډو او مراسمو کې د الکولو عامه استعمال منع کړی او سلګونه ښوونځي یې تړلي دي.
په انګلستان او وېلز کې میلیونونه خلک د «شدیدې ګرمۍ» تر خبرداري لاندې دي. د بریتانیا د روغتیايي خوندیتوب ادارې د تودوخې او روغتیا په تړاو د تر ټولو لوړې کچې خبرداری صادر کړی.
داسې اندېښنې موجودې دي چې هېواد به د جون میاشتې د تودوخې خپل تاریخي ریکارډ مات کړي.
هسپانیا او ایټالیا هم د تر ټولو لوړې درجې تودوخې اصلي مرکز ښودل شوي.
په دواړو هېوادونو کې د ګڼو ښارونو تودوخه په دوامداره توګه د ۴۰ څخه کله کله د سانتيګراد تر ۴۴ درجو پورې هم رسېږي.