پرتګال د فوټبال په نړیوال جام کې د پنجشنبې په ورځ (جولای ۲) وکولای شول چې کرویشیا ته ۲-۱ ماتې ورکړې او د ۱۶ غوره لوبډلو پړاو ته لار ومومي.
دغه بري د جمعې د ورځې په لومړیو ساعتونو کې د پرتګال په پلازمېنه لیزبن کې د خوښیو او جشن فضا رامنځته کړه.
پرتګالي ستوري کریسټیانو رونالډو په لومړي ځل د نړیوال جام په حذفي پړاو کې ګول وواهه.
د لوبې د پای د اضافي وخت په وروستیو شېبو کې پرتګالي ګونزالو راموس په سر ګول وواهه، او د ۱۶ غوره لوبډلو په پړاو کې یې له هسپانیې سره د سیالۍ زمینه برابره کړه.
د پرتګال لوبډله په داسې حال کې میدان ته کښته شوه چې د دوی د مخکښ لوبغاړي ډېګو ژوتا د مړینې کلیزه وه. ژوتا یو کال وړاندې په یوه ترافیکي پېښه کې مړ شو.
د ټورنټو په لوبغالي کې د پرتګال د ملي سرود له غږولو وروسته، ددغه ۲۱ شمیرې لرونکي لوبغاړي انځورونه وښودل شول. وروسته پرتګالي مینه والو د لوبې په ۲۱مه دقیقه کې د هغه د یاد او درناوي لپاره د یوې شیبې لپاره ودرېدل.
په لیزبن کې هم مینه والو د خپلو موبایل ټیلیفونونو څراغونه روښانه کړل او د ژوتا یاد یې ونمانځه.
ټاکل شوې چې پرتګال د دوشنبې په ورځ (جولای ۶) د ټکساس ایالت په ډالاس کې له هسپانیې سره مخامخ شي، او د دې لوبې ګټونکې لوبډله به د نړیوال جام د کوارټر فاینل په پړاو کې د بلجیم او متحدو ایالتونو د لوبې له ګټونکي لوبډلې سره سیالي وکړي.
هسپانوي مینه والو هم د کلیفورنیا په لاس انجلس کې د ۳۲ غوره لوبډلو په پړاو کې د اتریش پر وړاندې د خپلې لوبډلې بری ونمانځه.
هسپانوي لوبغاړي له اتریش سره په لوبه کې خپل دوهم ګول نمانځي.
هسپانیې په دغه جام کې خپلو سیالانو ته یو ځل بیا خپل ځواک وښود او د میکل اویارزابال د دوو ګولونو په مټ یې اتریش ته د صفر په مقابل کې په دریو ګولونو ماتې ورکړه او د ۱۶ غوره لوبډلو پړاو ته یې لار وموندله.
هسپانیه د نړیوال جام له پیل وړاندې د اتلولۍ د ګټلو له مهمو نوماندانو څخه ګڼل کیده او تر اوسه په شویو لوبو کې هیڅ لوبډله د هسپانیې په وړاندې د ګول په وهلو نده توانېدلې.
د پنجشنبې په ورځ په یوه بله لوبه کې سویس الجزایر ته ۰-۲ ماتې ورکړه او د ۱۶ غوره لوبډلو پړاو ته یې لار وموندله.
متحده ایالتونه د راتلونکې دوشنبې په ورځ د ۱۶ غوره لوبډلو په پړاو کې له بلجیم سره او پرتګال له هسپانیې سره مخامخ کیږي.