د امریکا د جمهور رئیس مرستیالې کاملا هریس د دوشنبې په ورځ ډسمبر ۱۳ (لیندۍ۲۲) د مرکزي امریکا په هیوادونو کې د امریکایي کمپنیو لخوا د ۱.۲ میلیاردو ډالرو پانګې اچونې اعلان وکړ.
دا پانګونه د متحده ایالاتو د هغه پروګرام برخه ده چې هدف یې د سیمې نه امریکا ته د کډوالو د راتګ مخنیوی دی.
میرمن هریس د امریکا د لسو شرکتونو د مشرانو سره د ملاقات نه وړاندې چې په مرکزي آسیا کې د پانګونې په هکله یې ورسره خبرې کولې، وویل چې متحده ایالات په سیمې کې د کډوالۍ د ستونزې په حل کې مهم نقش لري".
د امریکا د جمهور رئیس مرستیالې وویل چې "په اوس وخت کې زمونږ حکومت دا کار په یوازې ځان نشي کولی".
په همدې حال کې سپینې ماڼۍ ویلي چې د پیپسي کو، ماسټر کارت او کارګیل په نامه شرکتونه غواړي د مرکزي آسیا په هیوادونو کې پانګونه وکړي.
کاملا هریس د مرکزي آسیا د هیوادونو څخه د متحده ایالاتو سرحد ته د کډوالو د راتګ د مخنیوي لپاره دجمهور رئیس جو بایډن د حکومت د هڅو مشري کوي او تمرکز یې د هغو ستونزو حل کول دي چې خلک کډوالۍ ټه مجبوروي.
پدې ستونزو کې د اقتصادي فرصتونو نشتوالی مهم عامل بلل کيږي.
میرمن هریس وایي د متحده ایالاتو د حکومت پلان دا ندی چې په سیمه کې خلکو ته ووایي چې څه وکړي بلکې پدې هیوادونو کې د خلکو د طبیعي غوښتنو په پوره کیدو کې ګډ کار او همکاري کول دي.
د امریکا سرحدي ځواکونه د ۲۰۲۰ کال د سپټمبر د میاشتې نه د ۲۰۲۱ کال د سپټمبر تر میاشتې پورې د امریکا –مکسیکو په سرحد کې د۱.۶ میلیون کډوالو سره مخ شویدي.