د امریکا د کانګرس غړي د نومبر د درېیمې نېټې منځمهالو ټاکنو ته د چمتووالي لپاره له واشنګټن څخه خپلو ایالتونو ته ستانه شوي دي.
جمهوري غوښتونکي هڅه کوي په سنا او د استازو په مجلس کې خپل اکثریت وساتي، په داسې حال کې چې دیموکراتان غواړي د ټاکنو له لارې په کانګرس کې د واک توازن بدل کړي.
ولسمشر ډونالډ ټرمپ د پنجشنبې په ورځ د اوکتوبر لومړۍ د جمهوري غوښتونکو د نوماندانو د ملاتړ لپاره د هغو ایالتونو سفر پیل کړ چې په ټاکنو کې یې سیالۍ ډیرې نږدې دي. د سنا د دیموکراتانو مشر چک شومر بیا ویلي چې رایه ورکوونکي د هېواد لپاره د نوي مسیر غوښتونکي دي.
د امریکا د سنا غړو د چهارشنبې په ورځ په واشنګټن کې خپلې وروستۍ رایې ورکړې او له هغې وروسته یې د ټاکنیزو کمپاینونو لپاره خپلو ایالتونو ته سفر پیل کړ.
د نومبر په ټاکنو کې د سنا د ۱۰۰ څوکیو له جملې نه د ۳۵ څوکیو لپاره سیالي کېږي. جمهوري غوښتونکي اوس په سنا کې ۵۳ څوکۍ او دیموکراتان ۴۷ څوکۍ لري. د الاسکا، آیوا، مېن، میشیګن، اوهایو او ټکساس د سنا ټاکنې له هغو سیالیو څخه دي چې ډېره پاملرنه ورته کېږي.
د استازو د مجلس د ټولو ۴۳۵ څوکیو لپاره هم د نومبر په ټاکنو کې سیالي کېږي. جمهوري غوښتونکي په دغه مجلس کې هم لږ اکثریت لري.
په تېرو څو لسیزو کې د منځمهالو ټاکنو پر مهال د ولسمشر د ګوند د څوکیو له لاسه ورکول معمول پاتې شوي دي. په ۲۰۱۸ کال کې، د ټرمپ د لومړۍ ولسمشرۍ دورې پر مهال، دیموکراتانو د ۴۰ څوکیو په ترلاسه کولو د استازو د مجلس کنټرول ترلاسه کړه. په ۲۰۲۲ کال کې جمهوري غوښتونکو نهه څوکۍ زیاتې کړې او د هغه مهال د ولسمشر جو بایډن له دیموکرات ګوند څخه یې د مجلس کنټرول واخیست.
د نومبر په ټاکنو کې د ایالتونو په کچه هم مهمې سیالۍ کېږي. د ۳۶ ایالتونو د والي څوکۍ او د ایالتي مقننه ادارو د کنټرول لپاره ګڼې سیالۍ به هم ترسره شي.
په ټاکنو کې بریالي د کانګرس غړي به د ۲۰۲۷ کال د جنورۍ په درېیمه دندې پیل کړي