د امریکا ولسمشر ډونالډ ټرمپ وايي چې متحده ایالتونو د ډنمارک پاچاهۍ او ګرینلنډ سره یوه هوکړه کړې چې له مخې یې متحده ایالاتو ته د ګرینلنډ پر امنیت او نورو اړتیاوو "دایمي کنټرول" ورکوي.
ولسمشر ټرمپ د سپټمبر په ۱۸مه، د جمعې په ورځ په یوه اعلامیه کې وویل چې دا هوکړه د ګرینلنډ په اړه د متحده ایالتونو اوږدمهاله اندېښنې لري کوي، هغه زیاته کړې چې د دې هوکړې پلي کول به متحده ایالاتو ته هیڅ لګښت ونلري.
ټرمپ وویل: "زما په لارښوونه، موږ د ډنمارک او ګرینلنډ له استازو سره همکاري وکړه ترڅو ډاډ ترلاسه کړو چې متحده ایالات به د تل لپاره په ګرینلنډ کې د متحدو ایالتونو او ګرینلنډ د امنیت د دفاع او تامین لپاره د اقداماتو د ترسره کیدو وړتیا ولري. "
هغه همدارنګه اعلان وکړ چې امریکا په پام کې لري د ګرینلنډ په مناسبو برخو کې پراخ پوځي حضور هم پیل کړي او واشنګټن به د ګرینلنډ له خلکو سره د پراختیا او جوړولو په برخه کې کار وکړي. دا په داسې حال کې ده چې امریکا لا دمخه په ګرینلنډ کې یوه پوځي اډه لري.
په اعلامیه کې راغلي: "د واشنګټن له کتبي اجازې پرته به د امریکا هیڅ رقیب اجازه ونلري چې په ګرینلنډ کې پوځي اډه جوړه کړي، پوځي حضور ولري او یا هم په حساسو برخو کې پانګونه وکړي."
ګرینلنډ چې د معدني موادو څخه بډای دی د ډنمارک یوه خپلواکه سیمه ګڼل کیږي او د دې ټاپو بهرنۍ او امنیتي تګلاره کنټرولوي. خو ولسمشر ټرمپ په پرله پسې ډول ټینګار کړی چې متحده ایالات د ملي امنیت د موخو لپاره ګرینلنډ ته اړتیا لري.
ښاغلي ټرمپ مخکې ویلي وو: "موږ د ملي امنیت لپاره ګرینلنډ ته اړتیا لرو، نه د کانونو لپاره – موږ د کانونو او تیلو لپاره ډېر ځایونه لرو. موږ د نړۍ له هر بل هیواد څخه ډېر تیل لرو. موږ ګرینلنډ ته د ملي امنیت لپاره اړتیا لرو، او که تاسو ګرینلنډ ته وګورئ، د ساحل ښکته او پورته یې وګوري، په ټولو ځایونو کې چیني او روسي کښتۍ وینئ. موږ ورته د ملي امنیت لپاره اړتیا لرو، موږ باید دا ترلاسه کړو."
ولسمشر ټرمپ وویل چې ولسمشرانو د څه باندې سلو کلونو راهیسې د ګرینلنډ ستراتیژیک اهمیت پېژندلی و، خو هیچا یې په اړه د هېڅ کار کولو توان نه درلود. هغه زیاته کړه: "زه ویاړم هغه ولسمشر یم چې دا ډېره مهمه قضیه مې د تل لپاره په پریکنده ډول هواره کړه."
ټرمپ دا هوکړه "د تل لپاره یو هوکړه" وبلله او ویې ویل چې پای به یې نه وي.
هغه دا هوکړه د متحده ایالتونو، ډنمارک، ګرینلنډ او د امریکا د متحدینو لپاره یوه حل لاره وبلله، او ویې ویل چې واشنګټن د دې لویې او ستراتیژیکې ځمکې په اړه د یوې لویې راتلونکې لپاره د ډنمارک او ګرینلنډ له خلکو سره همکارۍ ته لېواله دی.
ټرمپ د خپلو خبرو په پای کې ویلي امریکا به د ګرینلنډ "ډېره ښه ساتنه" وکړي، او دا هوکړه یې د متحده ایالتونو لپاره "د یو خوب رښتیا کېدل" او یوه مهمه، تاریخي او ځانګړی موضوع بللې.