د کندهار امنیتي مقامات وايې، د داعش ډلي یو مهم غړی يې نیولی چې غوښتل يې په کندهار کې د اسلامي دولت د ډلې فعالیت ته زمینه برابره کړي.
د کندهار امنیتي مقامات وايې چې د عبدالسلام په نوم د داعش ډلي نیول شوي قوماندان د کونړ په ولایت کې د شاوخوا ١٠٠ تنو داعش جنګیاليو مشري کوله او تازه يې غوښتل چې په کندهار کې د داعش د فعالیتونو لپاره جلب و جذب وکړي.
د کندهار والي حیات الله حیات د ملي امنیت د ادارې له لوري د داعش ډلي ددغه قوماندان نیول تائید کړي دي.
د کندهار د ملي امنیت رئیس جنرال برکت الله څمکنی وايې د داعش ددغه قوماندان د نیولو ترڅنگ دغې ادارې په لسګونه هغه وسله وال نیولي چې په کندهار ښار کې د هدفي وژنو په گډون په امنیتي پیښو کې یې لاس درلود.
د ملي امنیت ادارې نن د شنبې په ورځ په کندهار کې نیول شوي وسله والو رسنیو ته وښودل او د رسنیو سره یې د پلټنو پر مهال د هغوی ثبت شوي ویډيو کليپونه شریک کړل چې دغو وسله والو په کې په کړنو اعترافونه کړي دي.
له بلې خوا د کندهار ښار په ګاونډ کې د ارغنداب ولسوالۍ پر امنیتي پوستو وسله وال بریدونه او د کندهار – خاکریز ولسوالۍ د لاري تړل کیده هغه پېښي دي چې د کندهار اوسیدونکي یې اندیښمن کړي او له حکومت غواړي چې د امنیت ټينګولو ته زیاته پاملرنه وکړي.
